IGE loke estrada foun ba Suku Lontas. Imajen espesiál

DILI, 9 jullu 2019 (TATOLI)—Xefe Suku Lontas, Postu Administrativu Lolotoe, Munisípiu Bobonaro, Alípio Belo sente kontente tanba Ministériu Obra Públika (MOP) liuhusi Institutu Jestaun Ekipamentu (IGE-sigla portugés), ohin,  hahú loke ona estrada foun ho ateru hahú hosi Aldeia Tasmil ba Suku Lontas.

Autoridade lokál ne’e informa, MOP liuhosi ekipa IGE loke estrada refere hafoin iha kinta (04/07/2019) hala’o survei atu loke estrada foun ne’e.

“Ekipamentu IGE to’o tiha ona, ohin. Ha’u orgullu no lori komunidade nia naran hato’o agradese wa’in ba MOP liuhosi funsionáriu IGE ne’ebé maka hatuun ona despaixu ho urjente,” tenik nia ba TATOLI liuhosi rede sosiál (messenger), ohin.

Hanesan autoridade lokál, tuir nia, senta katak ida ne’e maka povu ki’ik sira iha área rurál presiza tanba importante tebes.

Líder komunitáriu ne’e haktuir, hosi inísiu to’o agora foin ba dahuluk iha mandatu Oitavu Governu konstitusionál konsege habelar dezenvolvimentu iha setór estrada hahú hosi nível aldeia to’o suku hodi fasilita komunidade asesu ba merkadu.

“Povu ne’ebé maka maioria hela iha foho, fásil mós atu asesu ba iha merkadu lori sira-nia produtu lokál ba merkadu bainhira estrada di’ak no husu ba VIII Governu kontinua mós loke iha suku seluk,” nia rekomenda.

Tuir sensus populasaun tinan 2015, populasaun Lontas totál populasaun hamutuk 612, medida suku refere 19,81 km². Suku Lontas iha aldeia sira mak hanesan Ozo, Piron no Tas Mil.

Jornalista: Florensio Miranda Ximenes

Editór: Xisto Freitas

HAKEREK NO HATÁN

Please enter your comment!
Please enter your name here