Semináriu kona-ba prosesu adezaun TL ba ASEAN ne’ebé hala’o iha kampus UNDIL. Imajen Tatoli/Evaristo Soares Martins

DILI, 9 jullu 2019 (TATOLI)—Universidade Dili (UNDIL), ohin, organiza semináriu kona-ba prosesu Timor-Leste nian atu adere ba Asosiasaun Nasaun Sudeste Aziátiku (ASEAN-sigla inglés).

Universidade Dili (UNDIL) organiza semináriu ne’e ho objetivu atu hatene perspetiva Indonézia, Filipina, Tailándia no Brunei Darussalam nian ba prosesu Timor-Leste atu adere ba ASEAN, nune’e estudante Departamentu Siénsia Sosiál liuhosi relasaun internasionál iha koñesimentu kona-ba perspetiva nasaun membru ASEAN ba Timor-Leste nia prosesu adezaun. Semináriu ne’e hala’o durante loron ida tomak.

UNDIL konvida Embaixadór Indonézia ba Timor-Leste, Sahat Sitorus, Embaixadór Filipina ba Timor-Leste, Abdulmaid K. Muin; Embaixadór Tailándia ba Timor-Leste, Danai Karnpoj, Embaixadór Brunei Darussalam ba Timor-Leste, Adman Jaafar; maibé partisipa de’it Embaixadór Indonézia ho Filipina.

Oradór ba semináriu ne’e, Embaixadór Indonézia ba Timor-Leste, Sahat Sitorus, Embaixadór Filipina ba Timor-Leste, Abdulmaid K. Muin.

Reitór UNDIL, José Belo Pereira, hateten razaun UNDIL foti tópiku ASEAN, tanba Timor-Leste tinan barak ona luta atu tama ba ASEAN, maibé tanba kritéria balun sai hanesan difikuldade ba Timor-Leste.

“Ita tenke diskute vantajen no dezvantajen no kritériu sira. Estudu ne’ebé UNDIL halo ita sente dehan iha dezvantajen balun, maibé ita haree vantajen boot liu bainhira ita tama ASEAN. Preokupasaun hosi nasaun sira ASEAN, sira dehan keta espetu ekonomia, estratéjia, jeopolítika ita bele sai problema ba ASEAN ka lae,” José esplika iha kampus UNDIL, Mascarenhas, Dili.

Nia dehan, bainhira Timor-Leste tama lori dinámika ba ASEAN, bele ajuda poténsia ekonomia ne’e iha nasaun tomak tanba Timor-Leste mós iha G7+ ho CPLP.

“Ita hatene katak merkadu boot iha Amérika Latina, Brazíl mak lidera. Ita mós iha ligasaun ho nasaun sira iha Áfrika hanesan Angola, Moçambique, Cabo Verde. Ita mós ligasaun ho Macau, liliu Xina nian, ligasaun ho Europa tanba Portugál. Ita-nia ligasaun forte liu ne’ebé fó liu vantajen para nasaun sira ne’e bele serbisu hamutuk ho ita,” nia katak.

Nia afirma, posibilidade prezensa Timor-Leste (TL) nian ba ASEAN iha futuru muda filozofia, entaun universidade mós tenke prepara-aan hodi kompete iha ASEAN.

Tuir nia, sistema Timor-Leste nian uza modelu portugál ho Europa nian, maibé sistema ne’ebé uza iha ASEAN adota sistema Estadu Unidu Amérika . Tanba ne’e, tenke iha kombinasaun no kualidade merkadu ida ne’ebé mak Timor hakarak.

“Aban bainrua regulamentu sira ne’e tenke muda. Ita prodúz ema la’ós serbisu de’it iha Timor-Leste, maibé bele serbisu iha Indonéza, Filipina. Sira mós bele mai serbisu iha Timor-Leste. Ne’e mak ita presiza diskute kle’an,” reitór ne’e afirma.

Nia esplika, perspetiva hosi akadémiku nian katak bainhira TL tama ona sei partisipa reuniaun barak tebes, entaun TL tenke iha fasilidade hanesan otél ne’ebé di’ak, infraestrutura, transporte, mentalidade nune’e bele simu sira ho di’ak.

Nune’e mós, rekursu umanu Timor-Leste nian tenke aas liu hosi sufisiente, língua ingléz tenke forte para bele lidera semináriu bainhira sira fó konfiansa.

Iha sesaun lokraik, UNDIL konvida Diretór Jerál Asuntu ASEAN, Jorge Trindade Neves de Camões, lori matéria kona-ba importánsia ASEAN ba Timor-Lete hosi perspetiva oportunidade no dezafiu, Eis Ministru Negósiu Estranjeiru no Kooperasaun, José Luís  Guterres lori matéria observasaun kona-ba importánsia no prosesu adezaun Timor-Leste ba ASEAN, Diretór Forum ONG Timor-Leste (FONGTIL), Daniel Carmo dos Santos, lori matéria importánsia adezaun Timor-Leste ba ASEAN hosi perspetiva sosiedade sivíl no Reitór UNDIL, lori matéria hosi perspetiva akadémiku nian.

Jornalista: Evaristo Soares Martins

Editór: Xisto Freitas

HAKEREK NO HATÁN

Please enter your comment!
Please enter your name here