Xefi Departamentu Alta Kompetisaun hosi Sekretaria Estadu Juventude no Desportu (SEJD), Egas Freitas

DILI, 8 jullu 2019 (TATOLI)—Xefi Departamentu Alta Kompetisaun hosi Sekretaria Estadu Juventude no Desportu (SEJD), Egas Freitas, informa SEJD aloka ona orsamentu ba federasaun hitu (7) atu realiza kompetisaun nasionál.

“Federasaun hamutuk hitu (7) mak ami apoiu ona osan ba sira. Balun seidauk hetan apoiu tanba sira seidauk submete sira-nia proposta no balun proposta mai ona maibé despaisu mak seidauk tuun mai iha ami-nia diresaun,” tenik Egas ba Agência Tatoli iha edifísiu SEJD, Lecidere, Dili, ohin.

Nia esplika, orsamentu ba federasaun sira ho montante ne’ebé la hanesan. “Komapara ho tinan hirak liu-ba ho agora, montante osan ne’e ki’ik liu. Razaun ki’ik tanba pakote fiskál ne’e ki’ik. Entaun, ita tenke halo jestaun oinsá atu nune’e federasaun sira bele hetan hotu. Entre federasaun hirak ne’e, balun hetan rihun $10, balun rihun $7 no balun rihun $15,” Egas esplika.

Nia informa, federsaun hitu ne’ebé hetan ona apoiu mak hanesan Liga Futeból Amadora (LFA) tama iha verba ba Federssaun Futeból Timor-Leste (FFTL), Taekwondo, Boxe, Siklizmu, Sadres, Komité Paralímpku Nasionál Timor-Leste (CPNTL-sigla portugés) no SOTL.

Entretantu, tuir dadus ne’ebé iha, federasaun hamutuk 26 mak hetan rekoñesimentu hosi Konfederasaun Dezportiva Timor-Leste (CDTL-sigla portugés) hodi hamriik hanesan federasaun legál iha Timor-Leste. Federasaun hirak ne’e mak hanesan Atletizmu, Aikido, Basketból, Badminton, Boxe, Siklizmu, Kriket, Foteból, Halterofilizmu, Judo, Karate-do, Kempo, Motokross, Natasaun, Netball, Silat, Sailing, Ski, Tiru, Taekwondo, Tenis Kampo, Tenis Meza, Voleiból, Xadres, Whusu no Muaythai.

Jornalista: Hortençio Sanchez

Editór: Xisto Freitas

HAKEREK NO HATÁN

Please enter your comment!
Please enter your name here