Igreja Letefoho ne'ebé hetan ona reabilitasaun. Imajén/Espesiál

DILI, 09 jullu 2019 (TATOLI) – Sarani lubun ua’in husi  Parókia Nossa Señora do Carmo Letefoho, Ermera, kontribui fundu hamutuk $50,000 hodi hadi’a infraestrutura igreja antiga iha Talala ne’ebé lokaliza iha Suku Haufu.

Sarani Letefoho halo reabilitasaun ba Estatua Kristu Liurai iha Letefoho. Imajen/Espesiál

Ho fundu ne’e, sarani sira konsege jere hodi harii moru moru hale’u fatin misa kampál ho medida aas metru rua no naruk metru 80, halo monumentu tinan 25 iha eskadaria, halo reabilitasaun  Igreja (Parókia), halo tenda misa ba VIP iha fatin misa kampál, reabilita dalan to’o Kristu Liurai no reabilita rate Padre Francisco Soares (mate iha masakre Suai) ho  rate Padre António Maia (Primeiru Padre husi Letefoho) no reabilita mós padre  sira nia rezidénsia.

Sarani sira ne’ebé kontribui maka’as to’o hetan fundu refere, mai husi sarani estudante, joven sira, funsionáriu, veteranu, emprezáriu sira, no traballadór Letefoho oan iha Koreia du Sul, inklui sarani balun husi parókia seluk, konta mós ho Jorge Serrano no Dulce da Cunha.

Mekanizmu kontribuisaun ne’e husi parte parókia deside katak, estudante sira iha ensinu báziku kada ema kontribui 0,25 sentavu, estudante sekundáriu 0,50 sentavu, joven $1,00, kada família $5,00, veteranu $50,00 no  sarani barak mós oferese material hanesan simente, rai-henek, fatuk no seluk tan.

Konsellu Parokiál husi Parókia Nossa Señora do Carmo Letefoho, Ermera, hamutuk ho pároku, organiza sarani sira hodi halo kontribuisaun durante tinan ida, ho intensaun, atu hadi’a infraestrutura Igreja nian.

Pároku Letefoho, Padre Hélio Fernandes, ohin, viatelefone esplika,  programa ne’e, hanesan programa ida husi programa haat ne’ebé konsellu parokiál hala’o durante tinan ida, iha ámbitu komemorasaun ezisténsia parókia nian ba dala 25, ne’ebé sei selebra iha loron 16  jullu, tinan ne’e.

Pároku Letefoho, Padre Hélio Fernandes hatutan, atu komemora aniversáriu ezisténsia parókia ba dala 25,  komisaun organizadora deside hala’o jornada durante tinan tomak ho tema: Ó Nia Inan mak Ida Ne’e’’ (Jo 19,27).

Nia hateten, tema ne’e sai hanesan mata dalan ba sarani parókia Letefoho atu bele realiza atividade durante tinan ida ne’ebé ninia abertura iha loron 16 fulan Jullu 2018, no sei ensera iha loron 16 fulan Jullu tinan ne’e.

Padre Pároku durante tinan tomak akompaña sarani sira dezenvolve programa boot haat mak hanesan, programa pastoral, dezenvolvimentu infraestrutura igreja nian, Angriasaun Fundus, ikus liu maka programa arte no kultura.

Amu Hélio hateten, sarani Letefoho tenke kontribui duni tanba buat hirak ne’ebé hafurak festa tinan 25 ne’e hanesan liman rohan husi sarani rasik,   no mós ho kontribuisaun ne’e atu sarani sira bele iha sentidu de pertensia ba  parókia, liu tan ida ne’e atu kuda mentalidade ba sarani sira sentidu solidariedade no subsidiariedade.

Sarani sira mós orgullu, kontribui no kolaborativu tebes tanba, parte komisaun organizadora sempre transparente, esplika detallada kona ba gastu no mós duni rezultadu fíziku.

Kona ba atividade Pastoral nian, Amu Helio temi katak, hahú kedan husi loron 16 fulan jullu 2018, sarani sira lori estátua Nossa Señora do Carmo la’o hale’u hodi vizita sarani sira iha aldeia hamutuk 67 ho nia suku ualu (8), ne’ebé pretense ba postu administrativu Letefoho.

Durante vizita ne’e parte Konsellu Parokiál (ajente Pastoral sira) hala’o mós katekeze, formasaun Biblia, devosaun Mariana no pastoral konjunta.

Pastoral konjunta signifika, envolve parte autoridade husi postu administrativu, ho nia departamentu sira hanesan saúde, seguransa, edukasaun no seluk tan, ne’ebé esplika mós kona ba planu governu nian iha postu administrativu ne’e.

Durante pastoral konjunta ne’e ida-idak esplika ninia serbisu ba komunidade no rona preokupasaun husi komunidade rasik.

Amu fó ezemplu katak, husi parte saúde esplika kona-ba oinsá importánsia saúde iha moris komunidade, no parte seguransa esplika kona ba oinsá prevene krime iha komunidade. Alende ne’e parte Komisaun Organizadora esplika kona ba sentidu kontribuisaun ne’e rasik, atu nune’e sira bele hatene no kompriende saida mak sira fó la’ós fó iha ignoránsia.

Impaktu direta husi pastoral konjunta ne’e, Amu  Helio haree katak, bele redús ona krime balun ne’ebé durante ne’e buras mós iha postu administrativu ne’e inklui violénsia doméstika, aumenta koñesimentu komunidade kona ba moris saudavel, konvense sarani sira atu hatene kontribui ba Igreja ho laran.

Programa ikus liu maka arte no kultura, ho intensaun atu dezenvolve oinsá povu bele deskobre talentu no kapasidade liuhusi realiza kompetisaun oioin hanesan dansa kultura, konkursu múzika tradisionál, múzika relijiozu entre grupu kategoria sira iha parókia.

Preparasaun ba komemorasaun tinan 25 ezisténsia parókia Letefoho atinje ona 90%, no hein de’it atu kompleta, nune’e bele komemora iha loron 16  jullu tinan ne’e.

Oras ne’e daudaun, sarani katólika iha parókia Nossa Señora do Carmo Letefoho hamutuk 27.000.

Problema Pastorál

Dezafiu ne’ebé durante ne’e Konsellu Pastoral Letefoho enfrenta mak hanesan,   komunidade barak hela iha área remotas, ho kondisaun dalan ne’ebé aat, susar atu kobre hotu. Tanba ne’e, sarani sira ne’ebé dook sente dook nafatin, tanba la hetan asisténsia atu asesu ba sakramentu sira, liuliu misa, mina sarani no seluk tan, enkuantu iha mós limitasaun husi ajente pastorál rasik.

Jornalista         : Cipriano Colo

Editór               : Francisco Simões

 

 

HAKEREK NO HATÁN

Please enter your comment!
Please enter your name here