Embaixadór Indonézia ba Timor-Leste, Sahat Sitorus. Imajen/Egas Cristóvão

DILI, 9 jullu 2019 (TATOLI)—Embaixadór Indonézia ba Timor-Leste, Sahat Sitorus, hateten bainhira Timor-Leste (TL) adere ba Asosiasaun Nasaun Sudeste Aziátiku (ASEAN-sigla inglés), iha vantajen boot maibé iha mós dezafiu.

“Indonézia apoia Timor-Leste tama ba ASEAN. Ha’u fiar Timor-Leste sei tama. Agora kestaun tempu de’it. Tanba ne’e, estudante tenke hatene prosesu tomak,” Embaixadór Sahat Sitorus, ko’alia iha semináriu ne’ebé organiza hosi Universidade Dili (UNDIL), iha kampus UNDIL, Mascarenhas, Dili, tersa ne’e.

Tuir  nia, relevánsia tanbasá Timor-Leste hamutuk ho ASEAN tanba tuir artigu 6 kona-ba jeográfiku tuir duni kritéria. Nune’e mós, Timor-Leste ho nasaun membru sira iha ASEAN iha aspetu istória no kultura hanesan.

Embaixadór ne’e esplika, vantajen ba Timor-Leste bainhira sai membru ASEAN sai hanesan meiu hodi diskute isu polítika ho seguransa rejionál no iha mós oportunidade kooperasaun iha setór seguransa.

“Kona-ba vantajen ba ekonomia, ASEAN bele iha kapasidade loke asesu merkadu Timor-Leste nian, haree hosi rejionál no mós globalizasaun. Kona-ba sosiál no kultura bele iha oportunidade hasa’e rekursu umanu no loke odamatan ba iha setór sira seluk hanesan tipu formasaun, kooperasaun iha área téknika no bolsu estudu ba timoroan, Timor-Leste bele halo promosaun iha rejionál ASEAN nian,” Sitorus haktuir.

Maski nune’e, Sahat Sitorus iha nia aprezentasaun hateten, bainhira Timor-Leste tama ASEAN iha mós dezafiu, maibé dezafiu ne’e nasaun ne’ebé de’it sempre hasoru bainhira tama iha organizasaun internasionál ida.

“Presiza hasa’e rekursu umanu ho méritu iha setór públiku no privada. Timor-Leste presiza iha koñesimentu kle’an kona-ba ASEAN ne’e rasik, hanesan aspetu legál, mekanizmu no prosedimentu sira,” nia fó hanoin.

Indonézia, nia informa, sei apoia Timor-Leste iha fórum ASEAN no kooperasaun téknika iha setór saida de’it.

Embaixadór ne’e mós haktuir, Timor-Leste harii ona nia sekretariadu ASEAN iha Jenerál Rejionál nia okos, iha tinan 2008.

Iha fatin hanesan, Embaixadór Filipina ba Timor-Leste, Abdulmaid K. Min, hateten Filipina apoia Timor-Leste nia adezaun.

Tuir nia, Filipina fó apoia Timor-Leste dezde tinan 1999 liuhosi Peace Keeping Force (PKF), tanba ne’e, bainhira Timor-Leste atu adere ba ASEAN, Filipina apoia totálmente.

“Timor-Leste tama ba ASEAN la’ós lori ema ida nia naran, maibé lori estadu Timor-Leste nia naran. Entaun, ema hotu iha Timor tenke hatene prosesu ne’e, liliu ba estudante sira,” nia ko’alia bainhira sai oradór ba semináriu ida ne’ebé organiza hosi UNDIL.

Jornalista: Evaristo Soares Martins

Editór: Xisto Freitas

HAKEREK NO HATÁN

Please enter your comment!
Please enter your name here