Jornalista Bedino bainhira buka salva án molok hetan tiru-mate hosi BRIMOB iha Kuluhun, 26 agustu 1999. Imajen espesiál

DILI, 8 jullu 2019 (TATOLI)—To win without fighting is the best strategy of all—Ganhar sem fugir é a melhor estratégia de todos—Untuk menang tanpa harus bertarung adalah strategi terbaik—Atu manán la tenke baku malu nu’udar estratéjia di’ak liu (Sun Tzu, The Art of War).

Iha odamatan-boot “Konsulta Populár” nia oin, iha 1999, timoroan ida-idak buka luta atu manán tuir objetivu luta ida-nia hakarak no mehi. Membru FALINTIL sira ne’ebé iha biban ne’ebá halo akantonamentu iha Waimori, sira kumpri no rona iha Komandu Luta [Xanana Gusmão] nia haruka hodi labele funu-hasoru [baku malu] ho membru militár [TNI; Tentara Nasional Indonesia no POLRI; Polisi Republik Idnonesia] no milísia sira ne’ebé oho povu Timor-Leste iha vila-laran (1999).

Maibé ba grupu juventude Pro-Independénsia ne’ebé luta hela iha vila-laran, Dili, la homan-liman, hanesan matenek-na’in Sun Tzu iha nia livru “The Art os War” hateten. Juventude sira ne’e konsolida hanoin, konsolida kbiit hodi kontra brutalidade millitár no milísia (AITARAK) ho liman tanan de’it. Dalaruma komu-metin fatuk oan ida iha sira-nia liman hodi tuda hasoru kilat automátiku ne’ebé membru milísia sira uza hodi tiru sira. Dalabalun sira kaer netik iha sira-nia liman, surik-kro’at ka katana-kro’at oan ruma hodi hatudu lerek ba inimigu sira atu ta’uk netik.

Maibé, esforsu tomak ne’ebé juventude Pro-Indepedénsia sira iha Becora no Kuluhun halo hodi kontra milísia nia brutalidede iha Dili laran, hatudu sira-nia aten-brani hodi hatudu ba mundu katak juventude Timor-Leste tenke luta ho dignidade ho luta ida nia kbiit “Mate Ka Moris Ukun Rasik-Án”. Hakarak ukun rasik-án tenke fó án ba mate. Hakarak ukun rasik-án tenke fó án ba moris atu moris nafatin. Mate ka moris ukun rasik-án, katak tenke husik ita-nia planu sai nakukun no la borus hanesan kalan-nakukun, no wainhira ita book-án, monu hanesan rai-lakan be tarutu halo ema sira iha mundu rai-klaran admira no hakfodak.

Jornalista Bedino La Ta’uk Mate

Grupu Juventude Pro-Independénsia ne’ebé luta iha Becora no Kuluhun, nu’udar imajen ida katak juventude hirak ne’e la ta’uk “atu mate” no la ta’uk “mate”. Sira kumpri duni filozofia funu nian ne’ebé komandu luta nian injeta hela ba sira katak “Mate ka koris ukun rasik-án”. Sira la ta’uk mate. Sira la buka mate. Sira la mate tanba mate. Sira lahaluha mate. Maibé, sira hanoin hela atu mate. Ba sira, juventude, mate nu’udar odamatan-boot ba hasoru Maromak. Se sira hamriik ona iha odamatan-boot “Konsulta Populár”, sira luta atu manán votasaun no luta atu manán “mate”, luta atu “mate” ba objetivu ida mak liberta povu no liberta pátria hosi ta’uk ida atan nian no ta’uk ida mate nian.

Ida ne’e mak akontese ba membru grupu juventude Pro-Independénsia, ne’ebé hakna’ar-án nu’udar Jornalista “Vox Populi” no Jornalista Rádiu “Matebian”, Bedino Guterres. Nu’udar jornalista ida, nia hamutuk ho juventude hirak seluk luta hodi kaer fatuk tuda hasoru membru militár no membru milísia sira ne’ebé buka atu tiru-mate juventude sira ho kilat automátiku. Atu hasees-án hosi membru milísia sira-nia insultu [propaganda] hodi hasai lia-aat ba juventude hirak ne’e, Bedino halai hodi buka mahon ba BRIMOB sira atu hetan salvasaun maibé realidade ko’alia oin seluk. Mahon ne’e rasik mak tolan fali Bedino nia esperansa namlele iha luta ida-nia rohan.

Kona-ba akontesimentu ida ne’e, saudozu Fernando “Lasama” Araújo, fó sasin kona-ba jornalista timoroan, Bedino Guterres, nia mate tuir sá mak nia hatene. Lasama haktuir, jornalista Bedino Guterres nia mate husik hela memória aten brani nian, memória militánsia [Renetil] nian no memória luta informasaun nian ne’ebé labele mate no la mate tan.

“Iha 26 agustu 1999, tempu ba Pro-Autonomia sira halo sira-nia kampaña. Sira hahú konvoiu hosi edifísiu Governadór [atuál Palásiu Governu] hodi insulta ema iha dalan-dalan. Sira tuda fatuk ba uma no ema sira ne’ebé sira hetan. Iha Kuluhun, joven [pro-independénsia] sira responde asaun ba insultu no ataka hosi Pro-Autonomia nian hodi halo kontra ataka. Saida mak akontese tuir mai? Situasaun sai aat liu-tan. La’ós de’it tuda malu no insulta malu. Maibé membru BRIMOB sira tiru arbiru ba joven no povu babain ho kilat automátiku,” haktuir Saudozu Fernando “Lasama” Araújo.

Iha biban ne’e, Lasama fó sasin, membru BRIMOB sira konsege oho ema na’in tolu, inklui Bedino Guterres. Bedino Guterres nu’udar militante RENETIL, Repórter Rádiu Matebian no Jornalista Vox Populi. Bedino nia mate-isin labele hakohi ho di’ak no dignu, hanesan ema sira seluk ne’ebé mate iha situasaun hakmatek hodi halo tradisaun hakoi mate tuir ema ida-idak ninia kultura no identidade.

Tempu ne’ebá, feto ho labarik sira mak lori Bedino nia mate-isin ba hakoi. Mane sira labele ajuda tanba militár Indonézia no Milísia Pro-Autonomia hobur hela fatin akontesimentu. Mane sira tenke luta hodi salva án hosi mate no salva Timor-Leste hosi milísia sira-nia brutalidade. Aleinde saudozu Lasama maka sai sasin, iha tempu ne’ebá, jornalista internasionál sira no mós jornalista sira hosi Indonézia mak sai sasin-matan ba akontesimentu tiru-mate jornalista Bedino Guterres no intimidasaun sira hosi polísia.

Iha loron ne’ebá, 26 agustu 1999, falta loron tolu tama ba loron Konsulta Populár (30 agustu 1999), sidade Dili sai hanesan sidade-maten, sidade monok no sidade klamar laek. Timoroan sira ne’ebé hela-metin iha sidade Dili, sente hanesan moris hela iha infernu laran. Sei moris hela maibé sente hanesan klamar laiha isin-lolon. Sunu uma, sunu nafatin. Oho ema, oho nafatin, No. ida ne’e hanesan meiu intimidasaun ne’ebé viola direitu umanu hodi hata’uk povu Timor-Leste atu labele hakat ba sentru votasaun hodi hili sira-nia destiñu no sira-nia independénsia.

Iha akontesimentu BRIMOB oho Bedino Guterres iha Kuluhun de Baixo [1999], iha sasin moris ida ne’ebé filma ka kaptura hela akontesimentu ne’e iha ninia mákina-fotografia. Jornalista-Fotográfu, John Stanmayer, fó sai ninia sasin kona-ba Bedino Guterres nia mate be kruel ne’e.

“Bedino ain-tanan de’it. Nia kaer hela fatuk rua iha nia liman hodi proteje nia án hosi milísia. Nia halai ba husu grupu polísia BRIMOB ida mak besik hodi proteje nia hosi milísia. Sira la halo buat ida. Sira ignora nia. Nia husu ho haraik án tebes, maibé polísia hahú tuku no tebe nia. Nia halai sees hosi sira, halai mai hosi ha’u-nia oin. Bainhira nia halai liu ha’u-nia oin, polísia tiru mate Bedino,” haktuir John Stanmayer ba jornalista “Time Asia” iha tinan 2000.

Jornalista-Fotográfu, Jhon Stanmaye, la’ós haree de’it ho matan molik maibé ho mákina fotografia nia matan, nia konsege grava-metin jornalista Bedino Guterres nia mate no habelar ka halekar ba mundu tomak atu hatene. Bedino nia retratu ne’e publika duni iha mídia internasionál sira hanesan CNN no Time. Haree ida ne’e, komunidade internasionál sira hahú kondena aktu violasaun direitu umanu ne’e ba Governu Indonézia tanba sira viola Akordu 5 Maiu 1999. To’o ikus, nia (Stanmaye) tenke sai hosi Timor-Leste tanba nia hetan poténsia ameasa ne’ebé boot tebes hosi polísia Indonézia sira.

“Ha’u hanoin Joaquim Bernadino “Bedino”  Guterres loro-loron. Ha’u hakarak ema hotu la haluha Bedino tanba nia la ta’uk ba mate. Nia mós hanesan ita sira hotu. Loron ida, ita mós presiza luta ba ita-nia direitu báziku nu’udar umanu. Ita espera katak sira ne’ebé loloos ne’e atu proteje ita, sei la oho ita,” dehan Jornalista-Fotográfu, John Stanmayer.

Tanba Bedino Guterres nia mate nu’udar memória aten brani no memória luta informasaun nian ne’ebé labele mate mak iha tinan 2017, Konsellu Imprensa fó sertifikadu onra ba saudozu Bedino (Joaquim Bernadino Guterres), Repórter Rádiu Matebian no Jornalista Vox Populi, hamutuk ho jornalista nasionál no internasionál sira seluk hanesan; Roger East (Australiana Associated Press), Malcolm Harvie Rennie (TV. Chanel 9), Francisco Borja da Costa, Gregory John  Shackleton (TV. Chanel 7), Gary James Cunningham (TV, Chanel 7), Brian Raymond Peters (TV. Chanel 9), Anthony John Stewat (TV. Chanel 7), Kamal Ahmed Bamadhaj (Columnist for Asian Time), Sander Robert Thoenes (Financial Times).

Jornalista: Cancio Ximenes

Editór: Xisto Freitas

Klik mós notísia iha kraik atu lee…

http://www.tatoli.tl/2019/06/rai-hun-mutin-sae-dadaun-ona/

http://www.tatoli.tl/2019/06/rai-hun-mutin-sae-dadaun-ona-ii/

http://www.tatoli.tl/2019/06/rai-hun-mutin-sae-dadaun-ona-iii/

http://www.tatoli.tl/2019/06/rai-hun-mutin-sae-dadaun-ona-iv/

http://www.tatoli.tl/2019/06/rai-hun-mutin-sae-dadaun-ona-v/

http://www.tatoli.tl/2019/06/rai-hun-mutin-sae-dadaun-ona-vi/

http://www.tatoli.tl/2019/06/rai-hun-mutin-sae-dadaun-ona-vii/

http://www.tatoli.tl/2019/06/rai-hun-mutin-sae-dadaun-ona-viii/

http://www.tatoli.tl/2019/07/rai-hun-mutin-sae-dadaun-ona-ix/

HAKEREK NO HATÁN

Please enter your comment!
Please enter your name here