Defensor Públiku, Estaquio Guterres.

DILI, 09 jullu 2019 (TATOLI)—Atu minimiza konflitu iha rai laran maka Defensor Públiku (DP), Estaquio Guterres,  husu ba Estadu atu kria atividade, hanesan atividade desportiva no kria kampu serbisu.

“Ha’u akompaña no haree katak joven barak liu mak komete krime oi-oin,  tanba loron ba loron joven barak mak mai tuir julgamentu iha Tribunál Distritál Dili  (TDD) tanba komete krime no tuir ha’u nia haree atu minimiza konflitu entre juventude, maka Governu iha devér atu kria atividade hanesan atividade desportiva ou kria kampu serbisu,” hateten Estaquio Guterres, hodi responde ajénsia TATOLI, ohin, via mensajen WhatsApp.

Jurista ne’e la esplika detallu krime saida mak joven sira komete, maibé dala barak liu nia  akompaña no observa iha TDD mak hanesan entre joven ho joven husi suku ida ba suku seluk, husi grupu ida ba grupu seluk hodi  rezulta ema kanek no balun too lakon vida.

La’ós kria kampu serbisu de’it, tuir Estaquio Guterres katak, autoridade lokál sira iha bairru, aldeia, suku to’o munisípiu tenke kontrola joven sira nia movimentu atu labele monu ba iha manobra krime organizadu.

Iha biban ne’e, Defensor Públiku Fernando Carvalho hateten, buat barak mak halo joven sira envolve aan iha krime.

“Ita la haree ba buat ida de’it, maibé kompleksu tebes,” hateten Fernando Carvalho.

Nia hatutan, razaun balun joven sira halo tanba família ladún preokupa, balun tanba ransu entre joven sira ka ho grupu oi-oin, laiha kampu serbisu mak sai frustradu, balun tamba iha idade produtivu hodi buka hela nia identidade atu ema koñese, maibé balun halo tanba problema entre família ho kolega ne’ebé mak ho intensaun duni.

Jurista nee mós hatutan, solusaun mak atu minimiza krime iha joven nia leet mak husu ba Governu liuhusi autoridade iha terrenu, atu loke kualkér atividade desportiva iha bairru, suku, munisípiu too nasionál atu envolve joven sira iha atividade hirak nee.

Jornalista  : Domingos Piedade Freitas

Editór        : Francisco Simões

 

 

HAKEREK NO HATÁN

Please enter your comment!
Please enter your name here