Prezidente Federasaun Futeból Timor -Leste (FFTL), Francisco Gerónimo

DILI, 9 jullu 2019 (TATOLI)—Prezidente Federasaun Futeból Timor-Leste (FFTL), Francisco Gerónimo informa, orsamentu ne’ebé utiliza ba selu treinadór sira ne’ebé dadaun ne’e fó treinamentu ba Selesaun Nasionál ne’e hetan apoiu hosi Fédération Internationale de Football Association (FIFA) no Asian Football Confederation (AFC).

 “Osan sira ne’ebé dadaun Federasaun uza ami tenke fera ulun hodi konvense FIFA no AFC nune’e sira bele ajuda. Karik Governu iha osan atu ajuda tan, ha’u hanoin ne’e di’ak liu atu ajuda ita-nia futeból,” dehan Francisco Gerónimo ba jornalista sira iha edifísiu FFTL, Bairru Formosa, Dili, ohin.

Nia haktuir, FFTL agradese ba treinadór Fabiano José Flora ne’ebé sira fó fiar tanba iha hanoin ne’ebé di’ak hodi lori futeból ba oin.

“Treinadór ne’ebé ita fó ona kontratu hodi kaer Selesaun Nasionál ha’u hanoin nia di’ak tanba laduun husu saláriu ne’ebé boot. Nia husu rihun rua atus-lima ($ 2500) de’it. Ami hanoin ne’e razoável. Ita bele konvense FIFA hodi selu. Treinadór barak ami kontatu ona maibé sira husu ne’e karun demais,” nia haktuir.

Entretantu, proposta ne’ebé FFTL hato’o ba FIFA no AFC pozitivu ona. “Ami haruka ona karta ba FIFA no AFC. Sira fó sinál lampu modok ona. Ne’e mak ami halo ona kontratu ho treinadór,” Francisco esplika.

Nia hatutan, razaun ne’ebé mak FFTL husu apoiu finanseiru ba FIFA no AFC tanba orsamentu jerál Estadu la prevee uituan ba FFTL.

Antes ne’e, públiku kestiona FFTL tanba futeból iha Timor-Leste nunka la’o ba oin. Hatán ba kestaun ne’e, ema númeru ida iha FFTL ne’e dehan, sira kompriende saida mak públiku hakarak no tanba atu hadi’a futeból ne’e presiza iha krítika, maibé tanba Federasaun hasoru hela difikuldade ba osan entaun labele hatán tuir espetativa públiku, maibé ba futuru buat hotu sei la’o di’ak tuir públiku nia ezijénsia.

Jornalista: Hortençio Sanchez

Editór: Xisto Freitas

HAKEREK NO HATÁN

Please enter your comment!
Please enter your name here