Diretora MOFFE TL, Yasinta Lujina. Imajen/MOFFE TL

DILI, 09 jullu 2019 (TATOLI)—Movimentu Feto foin sa’e Timor Leste (MOFFE TL) kontinua haforsa no promove labarik no feto foin sa’e  sira nia partisipasaun ba dezenvolvimentu.

Diretora MOFFE TL, Yasinta Lujina, ohin, informa katak, MOFFE TL  mós harii ho objetivu katak luta kontra violasaun bazeia ba jéneru ne’ebé halo hasoru labarik ho  foin sa’e feto sira.

“Hau hakarak hatete de’it katak ema barak sei kontinua kestiona feto nia partisipasaun sei menus  maske ukun aan kleur tiha ona, tanba ne’e halo orientasaun atu nune’e reforsa ema hotu –hotu bele partisipa, liuliu grupu alvu sira ne’ebé mak ha’u mensiona ona katak ita tenke kapasita ona sira no fornese informasaun ne’ebé mak regular ba sira,”  informa Yasinta Lujina, hodi responde Ajénsia TATOLI iha salaun Fundasaun Alola, Dili.

MOFFE TL mós iha programa balu ne’ebé mak fó kapasitasaun no formasaun kona ba direitu  umanus, protesaun ba labarik sira, igualdade jéneru no mós violasaun bazeia ba jéneru, inklui saúde reprodutivu no  seksuál ba foin sa’e sira.

“Tanbasá mak dehan matéria importante ba sira tanba hakarak ema hotu-hotu partisipa iha prosesu dezenvolvimentu, liuliu sira mak sai autor ka ajente ba mudansa,” hateten Yasinta Lujina.

Nia esplika katak, ko’alia kona-ba igualdade jéneru, la’ós ko’alia de’it kona-ba númeru katak feto mane tenke hanesan, maibé mos kualidade husi partisipasaun ne’e mak importante atu bele fó benefísiu husi dezenvolvimentu ne’e ba ema hotu..

Nia dehan, atu atinje metas igualdade jéneru, ema hotu tenke respeita malu no respeita direitu ema ida-idak nian. Katak, labele viola ema seluk nia direitu, labele halo violasaun entaun ida ne’e mak bele moris hakmatek iha dezenvolvimentu nian no bele dehan indikadór iha igualdade.

Yasinta hatete, ko’alia kona ba ema hotu, entaun ko’alia mós inkluzaun liuliu grupu ema ho defisiénsia no identidade Lésbia, Biseksuál Gay, Transjender no Inter seksu (LBGTI).  Nune’e, ema kbiit laek sira ne’ebé  mak presiza ne’e labele haluhan sira no labele husik sira ba kotuk.

Jornalista          : Osoria A. Marques

Editór                : Francisco Simões

HAKEREK NO HATÁN

Please enter your comment!
Please enter your name here