DILI, 09 jullu 2019 (TATOLI-Reuniaun Konsellu Superior Defeza no Seguransa (KSDS) ne’ebé lidera husi Prezidente Repúblika, Francisco Guterres Lu Olo, ohin, deside hodi nomeia komandante komponente foun, kompostu husi Komandante Komponente Terrestre, Komponente Apoia Serbisu (CAS-sigla portugés), Komponente Navál no Sentru Formasaun no Treinu ho mandatu tinan rua (2019-2021).
Husi Komponente Terrestre, Tenente Koronél, Renilde Côrte-real da Silva, troka Tenente Koronél, Marcelino Ximenes ‘Rizai’, Komponente Apoia Servisu (CAS-sigla portugés), Tenente Koronél, Armindo Nunés dos Santos troka Tenente Koronél, Bendito Diaz Quintas ‘Punufanu’. Enkuantu, husi Komponente Sentru Formasaun no Treinu, Tenente Koronél, Cesario Ximenes Belo ‘Haksolok’ troka Tenente Koronél, Celestino Pinto ‘Daileba’ no Komandante Komponente Navál, Kapitaun João Silva, troka komandante sesante Kapitaun Fragata, Adão Bríto ‘Zecky’.
Xefe Estadu Maiór Jenerál FALINTIL-Forsa Defeza Timor Leste (F-FDTL), Majór Jenerál, Lere Anan Timur, esplika, nomeisaun ne’e bazeia ba kompeténsia Prezidente Repúblika, Francisco Guterres Lu Olo hafoin halo konsultasaun no rona opiniaun husi Konsellu Superior Defeza no Seguransa (KSDS).
“Prezidente Repúblika iha kompeténsia atu nomeia no ezonera komandante komponente, maibé la temi kona-ba tomada posse tanba posse ne’e so fó de’it ba Xefe Estadu Maior Jenerál ho Vise Xefe Estadu Maior,” esplika Lere Anan Timur ba ba Jornalista sira hafoin reuniaun Konsellu Superior Defeza no Seguransa iha Palásiu Prezidensiál, Bairru-Pité, Dili.
Kona-ba data posse, Lere Anan Timur, realsa, sei hein publikasaun iha jornal da repúblika iha tempu besik.
“La’ós tanba komandante sira sesante ne’e la susesu, ne’e própriu iha ami nia estatutu, rotatividade ba komandante komponente. Iha forsa armadas sei iha serbisu barak tanba ne’e balun sei mai fali operasaun, inspetoria, finansa no seluk tan,” afirma Lere Anan Timur.
Jornalista : Agapito dos Santos
Editór : Francisco Simões
