Primeiru-Ministru, Taur Matan Ruak, prezide reuniaun Konsellu Ministru Extraordináriu, iha Palásiu Governu, Dili, tersa (09/07/2019). Imajen/Egas Cristovão

DILI, 09 jullu 2019 (TATOLI) – Governu liuhosi reuniaun Konsellu Ministru estraordinária tersa ne’e, konklui ona prosedimentu nesesáriu ba Ratifikasaun Tratadu entre Repúblika Demokrátika Timor-Leste (RDTL) no Commonwealth Austrália, ne’ebé estabelese Fronteira Marítima iha Tasi Timor, akizisaun interese iha kampu petrolíferu no selebrasaun Akordu Dezenvolvimentu Greater Sunrise.

Konsellu Ministru rona aprezentasaun husi Xefe Negosiadór Prinsipál ba Delimitasaun Fronteira Marítima, Kayrala Xanana Gusmão no ekipa, nomós Prezidente Autoridade Nasionál Petróliu no Minerál (ANPM), Gualdinho da Silva, kona-ba rezumu no rezultadu prosesu negosiasaun Timor-Leste ho empreza petrolífera sira, ne’ebé  atuál opera iha área dezenvolvimentu konjuntu (JPDA-sigla inglés) no ba abrigu lisensa ne’ebé emite husi Austrália.

Ministru Estadu no Prezidénsia Konsellu Ministru, Agio Pereira informa enkontru ezekutivu iha loron rua nia laran konsege aprova ona Proposta Alterasaun Lei hodi submete ba Parlamentu Nasionál (PN) no Dekretu-Lei ba Prezidente Repúblika (PR).

Ministru Estadu Prezidénsia Konsellu Ministrus, Hermenegildo Augusto Cabral Pereira. Imajen/Egas Cristovão

“Loron rua ne’e Konsellu Ministru konklui hodi aprova Dekretu-Lei lima no ohin diskute no aprova mós rezolusaun balun kona-ba kontratu Bayu Udan no Buffalo ninian. Buffalo ho tratadu ne’e tama iha ita-nia soberania, la’ós ona iha área Austrália nian,” tenik Ministru Agio Pereira iha Palásiu Governu.

Governante ne’e akresenta, enkontru ohin haree mós ligasaun asuntu importante hanesan kuarentina, seguransa no ajustamentu lei sira tanba agora Timor-Leste laiha ona JPDA bainhira asina ona tratadu no laiha ona Timor Sea Treaty(Tratadu Mar Timor Mate), ne’ebé tratadu foun mak vigora.

“JPDA no Timor Sea Treaty tenke sai hotu no tau fali Tratadu entre Austrália no Timor-Leste, tanba bainhira tratadu asina (espera katak asina iha 30 agostu), hanesan troka nota para ita informa ba Austrália katak ita ratifika ona no Austrália informa ba ita katak sira mós konklui ona prosesu ratifikasaun. Ne’e hanesan tratadu ne’ebé ita asina 6 marsu 2018, entra em vigor,” nia dehan.

Enkuantu horseik lorokraik, Konsellu Ministru aprova ona Proposta Alterasaun Lei Tributária no Fundu Petrolíferu hodi submete ba PN.

Tuir governante ne’e, Proposta Lei sira, Primeiru-Ministru, Taur Matan Ruak no ministru relevante asina ona no ohin kedan sei hatuun iha PN Hodi serbisu tuir prosedimentu PN nian.

Enkuantu ba Dekretu-Lei ne’ebé ohin hetan aprovasaun tuir sistema Konsellu Ministru, asina husi Xefe Governu no ministru relavante, no hato’o diretamente ba PR hodi hetan aprovasaun.“Hein katak Dekretu-Lei no Lei sira ne’e sei publika iha Jornal Repúblika, molok ita besik loron 30 agostu hodi bele asina”.

Entretantu, Proposta-Lei ne’ebé submete ba PN hanesan adaptasaun lei fiskál nu’udar forma atu permite Timor-Leste hodi bele kobra impostu ne’ebé fahe husi atividade esplorasaun petrolífera iha Tasi Timor, ne’ebé previstu ba aumentu reseita fiskál liuhosi tributasaun atividade petrolífera iha kampu molok fahe ho Austrália.

Konsellu Ministru aprova mós rejime laborál no migratóriu espesífiku ba esplorasaun kampu petrolíferu Bayu-Undan.

Ezekutivu sira analisa no aprova Dekretu-Lei haat ne’ebé estabelese Tranzisaun Títulu Petrolíferu no Regulamentasaun Atividade Petrolífera iha Kampu Bayu-Undan, iha esplorasaun anteriormente iha área konjunta Dezenvolvimentu Petrolíferu, Iha Kampu Buffalo no área lisensa AC/L5 no WA18-L (Laminaria no Coralina), hanesan minuta ba kontratu ne’ebé fahe produsaun regulamenta termu ne’ebé refere atividade ho kontratante sira iha instrumentu kontratuál hanesan, atu efetiva tranzisaun.

Ikus liu, totál 50 dokumentu resin mak Konsellu Ministru aprova hanesan projetu Dekretu-Lei ba alterasaun Dekretu-Lei nú 20/2008, 19 juñu, ne’ebé kria ANPM ho objetivu atu adapta diploma orgániku ANPM ba regulamentu foun ho Tratadu Fronteira Marítima.

Jornalista :Julia Chatarina

Editór       : Rafy Belo

Notísia Relevante: http://www.tatoli.tl/2019/07/aban-governu-submete-proposta-alterasaun-lei-aprovadu-ba-pn/

HAKEREK NO HATÁN

Please enter your comment!
Please enter your name here