Primeiru-Ministru, Taur Matan Ruak, prezide reuniaun Konsellu Ministru Extraordináriu, iha Palásiu Governu, Dili, tersa (09/07/2019). Imajen/Egas Cristovão

DILI, 9 jullu 2019 (TATOLI)—Governu, ohin lorokraik, submete ona lei haat (4) ba Parlamentu Nasionál (PN) nune’e iha tempu badak bele ajenda no debate. Lei hirak ne’e mak hanesan alterasaun ba Lei Tributária, Lei Atividade Petrolífera, Lei Fundu Petrolíferu no lei rua seluk Nú. 3/2003 no Lei Nú. 4/2003.

“Alterasaun ne’e lei lima (5) maibé Governu halo ba lei haat (4) de’it tanba rua seluk junta iha proposta lei ida. Nune’e, ita sei haree ida ba ida hodi prosesu ne’e la’o,” tenik Prezidente Parlamentu Nasionál, Arão Noé de Jesus Amaral ba jornalista iha Parlamentu Nasionál, tersa lorokraik ne’e.

Arão esplika, lei hirak ne’e sei hatuun ba parte tékniku nian hodi haree legalidade no priénse kritériu ka lae. “Ida ne’e ami sei marka reuniaun ho líder bankada sira hodi hatuun ba komisaun. Tarde liu semana oin sei baixa ba komisaun tolu (3) hanesan Komisaun D, Komisaun B no Komisaun C. Tempu hira depende komisaun sira halo relatóriu mai plenária foin bele desidi,” nia esplika.

“Ami-nia previzaun fulan ne’e hotu bele konklui ona, maibé ida ne’e depende ba iha debate oinsá haree asuntu ba asuntu. Meza Parlamentu halo de’it jestaun para konklui. Haree ba asuntu ida ne’e importante, tan ne’e Parlamentu sei aselera nia prosesu ne’e,” Arão hatutan.

Jornalista: Hortençio Sanchez

Editór: Xisto Freitas

Lee mós notísia ida ne’e: http://www.tatoli.tl/2019/07/aban-governu-submete-proposta-alterasaun-lei-aprovadu-ba-pn/?fbclid=IwAR1p24dVJGwBLmQKyrD4FVzQTmV8gqEBtyWgjToMnvLId1x2x_4si-h_iEg

HAKEREK NO HATÁN

Please enter your comment!
Please enter your name here