Vise Ministru Edukasaun Juventude no Desportu, João Zacarias Freitas Soares, hasoru malu ho Eis Vice Ministru Edukasaun Tailándia atuál nu’udar Senadór Jenerál Surachet Chaiwong iha Tailándia. Imajen/Espesiál

DILI, 08 jullu 2019 (TATOLI)-Vise Ministru Edukasaun, Juventude no Desportu, João Zacarias Freitas Soares,  hasoru malu ho Eis Vise Ministru Edukasaun  Tailándia no agora nu’udar Senadór Jenerál Surachet Chaiwong iha almosu hamutuk ne’ebé oferese husi Senadór Surachet iha Tailándia.

Timor-Leste hetan konvite espesiál hodi simu delegasaun inklui estudante no orientadór sira ba tuir Scout Jamboree Ceremony bainhira Senadór sei assume kargu hanesan Vise Ministru Edukasaun durante hala’o vizita ofisial mai Timor-Leste husi loron 25 to’o 27 Abríl 2019.

Iha introdusaun Senadór Surachet hato’o bemvindu no agradese ba Vise Ministru ho delegasaun hodi konsidera ba konvite no bele hamutuk ho estudante eskuteiru Tailandés parte Leste hodi selebra koroasaun Liurai Rama X iha 4 Maiu 2019 ne’ebé troka nia aman Liurai Bhumibol Adulyadej (Rama IX) mate iha Outubru 2016 hafoin ukun tinan 70.

“Ha’u sei lembra metin hela ha’u nia vizita dahuluk ba Timor-Leste. Fotografia sira ho ita no estudante sira durante vizita ha’u  rai di’ak  no haruka ba Liurai. Ha’u kontente tebes ho vizita no ospitalidade ne’ebé imi hatudu ba ha’u. Ha’u agora iha Parlamentu maibé sei esforsu hodi apoiu nafatin Timor-Leste liu-liu iha área edukasaun no ha’u hakarak buat hirak ne’ebé ita ko’alia tenke kontinua nafatin,” haktuir membru Parlamentu Tailándia ne’e liu husi komunikadu ne’ebé  Ajénsia   Tatoli asesu, ohin,  husi Ministériu Edukasaun, Juventude no Desportu.

Fatin hanesan, Vise Ministru João Zacarias hato’o agradese ba enkontru importante ne’e hodi hametin liután kooperasaun.

“Hakarak hato’o ha’u  nia apresiasaun no agradese ba ita nia suporta ba Timor Leste hahú uluk bainhira ita sei ativu iha militár. Ita boot maneja no fó treinamentu ba militár Tailándia hodi partisipa iha Peace Keeping Force iha Timor Leste no too agora kontinua tau konsiderasaun espesiál ba Timor Leste,” dehan Vise Ministru João Zacarias.

Parte rua konkorda atu mantein komunikasaun no fahe informasaun ba malu hodi suporta nafatin Timor-Leste liu-liu iha setór edukasaun.

Vizita ne’e akompaña husi Embaixadór Repúblika Demokrátika Timor-Leste ba Reinu Tailándia, Joaquim Amaral ho delegasaun han meiudia hamutuk ho Senadór Surachet ho ofisiál sira husi Gabinete Senadór no reprezentante Ministériu da Edukasaun , Tailándia.

Jornalista: Eugénio Pereira

Editór       : Francisco Simões

HAKEREK NO HATÁN

Please enter your comment!
Please enter your name here