Vice Ministru Edukasaun Juventude no Desportu, João Zacarias Freitas Soares reprezenta Timor-Leste partisipa iha serimónia enseramentu Scout Jamboree Camp iha Chonburi, Tailándia. Imajen: Espesiál

DILI, 08 jullu 2019 (TATOLI)-Vise Ministru Edukasaun,  Juventude no Desportu, João Zacarias Freitas Soares,  reprezenta Timor-Leste hodi partisipa iha serimónia enserramentu Scout Jamboree Camp iha Chonburi, Tailándia.

Komunikadu ne’ebé Ajénsia  Tatoli asesu iha Portál Ministériu Edukasaun, ohin, relata katak,  Scout Jamboree Camp hala’o ona iha loron 5 to’o 9 juñu 2019, Governu Tailándia  konvida Timor-Leste hola parte iha Scout Jamboree Celebration iha okaziaun Koroasaun Liurai Rama X iha 4 Maiu 2019 ho tema “Volunteer Scouts do Good Deeds to Demonstrate Their United Loyalty and Honour for the King” ne’ebé realiza iha Chonburi, Tailándia.

Iha diskursu enserramentu Diretór Edukasaun Rejionál Chonburi agradese tebes ba prezensa Vise Ministru Edukasaun  Juventude no Desportu, João Zacarias Freitas Soares, ho delegasaun no liu-liu estudante no orientadór sira ne’ebé hola parte ona selebrasaun espesiál ne’e no admira ho performansia estudante Timoroan sira.

Iha inventu  ne’e aprezentasaun kulturál ne’ebé úniku no divertidu halo estudante eskuteiru Tailandés hakarak hatene no koñese liu tan Timor-Leste.

Hato’o mós esperansa boot katak Timor-Leste sei hola parte tan selebrasaun ne’e iha tinan oin ho númeru estudante no orientadór barak.

Partisipa mós iha eventu ne’e ho Vise Ministru ho delegasaun mak reprezentante nasaun RDTL iha nasaun Reinu Tailándia Embaixadór Joaquim Amaral.

Depoizde serimónia Vics Ministru ho delegasaun inklui estudante no orientadór sira hala’o vizita ba Geo-Informatics and Space Technology Development Agency (GISTDA) iha Sriracha, Tailándia.

GISTDA mak Ajénsia Espasiál Tailandés no organizasaun ba peskiza espasiál ne’ebé responsabiliza ba satélite ba sensoriamentu remote no dezenvolvimentu teknolojia.

Jornalista : Eugénio Pereira

Editór      : Francisco Simões

HAKEREK NO HATÁN

Please enter your comment!
Please enter your name here