Ministériu Negósiu Estranjeiru no Kooperasaun (MNEK). Foto: MNEK

DILI, 08 jullu 2019 (TATOLI)-Governu Timor-Leste ho Governu Territóriu Norte Austrália liuhosi enkontru Ministeriál Fórum ba dala lima diskute asuntu importante rua mak hanesan avalia kooperasaun ne’ebé Timor- Leste iha ho governu Territóriu Norte Austrália no seluk mak haree liu ba iha programa ba oin husi koopersaun Timor- Leste ho Governu Territóriu Norte Austrália.

“Ohin ita halao enkontru ba dalima Ministeriál Forúm entre governu Timor-Leste ho governu Territóriu Norte Austrália. Enkontru ida ohin iha objetivu rua ida maka atu avalia kooperasaun ne’ebé iha entre governu Timor- Leste no governu  Territóriu Norte Austrália. Objetivu ida seluk maka oinsa programa ba oin,” hateten Diretór Asuntu Sudeste Aziátiku no Oseania, Lisualdo Gaspar ba jornalista sira hafoin ramata Forúm Ministerial Meeting ne’ebé maka hala’o iha Salaun Diplamata Ministériu Negósiu Estranjeiru no Kooperasaun (MNEK), Praia dos Coqueiros, segunda (08/7/2019).

Nia dehan, daudaun ne’e governu rua iha kooperasaun liuhusi área oioin hanesan iha área saúde, edukasaun no mós iha área treinamentu ba traballadór sira iha SENAI-Servisu Nasionál Aprendizajen, Becora.

Alende ne’e, governu  Territóriu Norte Austrália fó mós apoiu liuhusi Kooperasaun iha Agrikultura nian hanesan jestaun ba lafaek nune’e mós área sira seluk.”Tanba ne’e ohin hala’o enkontru ba dala lima Timor-Leste sai uma na’in hodi avalia ba programa sira ne’e hodi haree oinsa ba futuru”.

Diretór Asuntu Sudeste Aziátiku no Oseania, Lisualdo Gaspar fundamenta katak governu Timor-Leste no governu Territóriu Norte Austrália liuhosi enkontru Ministeriál Fórum ne’e, governu rua halo kompromísiu, kontinua ho kooperasaun ne’ebé iha ona hodi hametin liután relasaun amizade, istoriku, ne’ebé iha la’ós de’it iha nivel governu entre país sira maibé haree mós oinsa enkoraza emprezáriu, envolvimentu setór privadu, hodi hametin liután iha futuru.

“Iha área barak ne’ebé identifika ona ezemplu ida maka halo jestaun ba lafaek. Ne’e hanesan área ne’ebé identifika importante ne’ebé maka iha no área sira seluk ne’ebé maka iha ita, ohin deskuti no comitment (komprimísiu) atu kontinua nafatin,” dehan Diretór Lisualdo.

Jornalista: Natalino Costa

Editór. : Rafy Belo

HAKEREK NO HATÁN

Please enter your comment!
Please enter your name here