DILI, 08 jullu 2019 (TATOLI) – Governu Timor-Leste reprezenta husi Ministru Estadu Prezidénsia Konsellu Ministru no Ministru Negósiu Estranjeiru ein ezersísiu, Agio Pereira no Ministru-Xefe Territóriu Norte Austrália (Darwin), Honorável Michael Gunner MLA asina akordu parseria estratéjia kona-ba implementasaun kuadru foun estratéjiku ba kooperasaun bilaterál.

Ministru Estadu Prezidénsia Konsellu Ministru no Ministru Negósiu Estranjeiru ein ezersísiu, Agio Pereira hateten, akordu foun ne’e hodi reforsu relasaun bilaterál entre Territóriu Norte Austrália ho Timor-Leste.

“Akordu ne’e importante tanba relasaun diadi entre Timor-Leste no Darwin tinan barak ona, ne’ebé agora ita halo akordu hodi rejista ita-nia intensaun prioridade loloos mak saida, para ita hakarak atu avansa to’o tinan 2022 mak ita halo fali revizaun ba akordu ne’e. Inklui mós Seasonal Workers,” tenik Ministru Agio Pereira, iha Palásiu Governu, segunda ne’e.

Ministru Estadu Prezidénsia Konsellu Ministrus Hermenegildo Augusto Cabral Pereira (liman los) asina akordu konaba implementasaun kuadru foun estratejiku ba kooperasaun bilateral ho Ministru Xefe Teritoriu Norte Darwin (Australia), Michel Gunner iha Salaun Palacio Governu dili, 7 Juilu 2019. Imajen/Antonio Goncalves

Tuir governante ne’e, Governu Timor-Leste hakarak Territóriu Norte Austrália fó tulun solusaun ba problema bee moos iha ita-nia rai, liu-liu iha munisípiu no suku sira hodi povu bele hetan bee moos no asegura saúde ba moris di’ak liután.

“Ministru-Xefe fó nia apoiu totál hakarak duni tulun hodi Timor-Leste iha polítika ida ne’e tanba ne’e importante, VIII Governu Konstitusionál define bee mós hanesan prioridade boot ida la’ós de’it ba 2020 maibé to’o mandatu Governu ramata,” nia dehan.

iha biban ne’e, Ministru Agio mós husu Ministru-Xefe Michael atu kontinua fó prioridade ba vizita entre Primeiru-Ministru, ministru no funsionáriu sira hodi bele reforsa konfiansa no apoiu.

Nune’e mós parte rua ne’e ko’alia mós kona-ba ratifikasaun Tratadu Fronteira Marítima entre Timor-Leste no Austrália.

“Ha’u dehan ba Ministru-Xefe katak, ita fiar iha loron 30 agostu iha ratifikasaun ba tratadu Timor-Leste bo Austrália ba Fronteira Marítima, ida ne’e sei afeta maka’as liu ba Darwin tanba Darwin mak ita-nia viziñu imediatu,” katak governante ne’e.

Governante ne’e mós informa, Timor-Leste agora daudauk iha intensaun atu dezenvolve indústria ikan (fishier industry) iha Tasi Mane no tanba Governu promete atu kontinua obra Governu ne’ebé uluk halo, ne’ebé Governu sei fó prioridade atu konklui Auto-Estrada iha Kosta Súl.

“Bainhira estrada ne’e to’o ona Beaço, nia impaktu boot ba indústria ikan ninia ne’ebé ita sei dezenvolve hodi bele tulun setór turizmu no setór seluk, atu ita-nia rai hases-an husi dependénsia ba Minarai no Gas,” akresenta Ministru Agio Pereira.

Jornalista: Julia Chatarina

Editór.     : Rafy Belo

HAKEREK NO HATÁN

Please enter your comment!
Please enter your name here