Sekretáriu Estadu Protesaun Sivíl, Alexandrinho Xavier Araújo. Foto Mídia Minist’eriu Interiór

DILI, 08 jullu 2019 (TATOLI)—Governu liuhosi Sekretaria Estadu Protesaun Sivíl (SEPC, sigla portugés) fó ona apoiu emerjénsia ba komunidade ne’ebé nia uma ahi-han iha konfrontu entre joven sira iha Aldeia Baura, Suku Leorema, Postu Administrativu Bazartete, Munisípiu Liquiçá.

 “Ahi-han uma hamutuk 13 hosi uma kain 12 ho ema 45 ne’e hetan ona apoiu emerjénsia hosi Ekipa Dezastre Naturál,” tenik Sekretáriu Estadu Protesaun Sivíl, Alexandrinho Xavier Araújo, ohin, iha Palásiu Governu, Dili.

Apoiu emerjénsia ne’e, governante ne’e dehan, vitíma sira hetan apoiu hanesan foos, supermie, lona no sasán dapur nian.

Ba apoiu rekooperasaun uma, Alexandrinho informa, Ekipa Dezastre Naturál halo ona verifikasaun atu bele apoiu materiál konstrusaun hanesan kalén no simentu sira hodi komunidade bele konstrui sira-nia uma.

Uma hamutuk 13 ne’e hetan sunu tanba mosu konfrontu entre grupu joven iha Aldeia Baura, Suku Leorema, Postu Administrativu Bazartete, Munisípiu Liquiçá, iha loron kuarta (04/07) lokoraik no kontinua iha loron sesta (05/07) madrugada.

Iha konfrontu ne’e, rezulta joven rua mate fatin, uma 13 no motór hitu hetan sunu. Aleinde ne’e, Alexandrinho informa, SEPC mós rekolla ona dadus hodi fó apoiu emerjénsia ba komunidade ne’ebé nia uma ahi-han iha Bidau Akadirun, Dili, semana kotuk.

Jornalista: Florensio Miranda Ximenes

Editór: Xisto Freitas

HAKEREK NO HATÁN

Please enter your comment!
Please enter your name here