DILI, 08 jullu 2019 (TATOLI)-Ministra Finansa ein ezersísiu, Sara Lobo Brites, informa, tékniku Ministériu Finansa aprezenta ona senáriu tolu ba preparasaun Orsamentu Jerál Estadu (OJE) 2020 no senáriu aas liu mak biliaun $1,6.

Aprezentasaun senáriu ba OJE 2020 ne’e liuhusi Jornada Orsamentál hodi define prioridade nasionál ba tinan oin nian ne’ebé hala’o iha salaun MF iha 27 juñu ne’e.

“Ida (biliaun) $1,4 no senáriu ida menus loos ne’ebé tékniku sira informa katak ne’e la viavel, entaun iha senáriu rua de’it mak ita sei hili,” atuál Vise-Ministra Finansa hatete, ohin, iha Palásiu Governu.

Tuir kalendáriu, MF sei aprezenta iha Konsellu Ministru (KM) iha 17 jullu, hafoin mak KM sei deside senáriu ida ne’ebé.

“Tanba aprezenta iha Konsellu Ministru sei aprezenta hotu orsamentu ba ministériu ida-idak ne’ebé tenke konta apoiu ba programa sira ne’ebé Primeiru-Ministru temi ona iha Jornada”.

Hatán ba senáriu OJE 2020 ne’e, liga ba reseita doméstika ne’ebé iha, Sara Lobo dehan, sei la foti osan liu biliaun $1,6 ba leten, mas kuandu foti barak ne’e hotu mós lalais tanba reseita doméstika nia kontribuisaun ba kreximentu ne’e  pur volta porsentu 10  to’o porsentu 11 de’it.

Tanba ne’e maka haree hela iha orsamentu ne’e, tuir Sara Lobo Brites, sei haree mós empréstimu iha tinan ne’e kontinua foti para bele finansia projetu infraestrutura sira ho projetu balu edukasaun nian no sei apura saldu balu ne’ebé eziste hela iha konta Estadu nia para utiliza fali ba orsamentu tinan oin.

Sara Lobo dehan, foti empréstimu tanba nia funan ne’ebé Timor-Leste atu selu ne’e ki’ik liu duké retornu ne’ebé mai husi Mina-rai, tanba ne’e foti husi empréstimu di’ak liu.

“Ita foti husi Fundu Mina-rai atubele finansia ita-nia projetu sira ne’e ita lakon tanba Fundu Mina-rai fó funan boot, mas ita foti husi empréstimu ho funan ki’ik no ita husik fundu Mina-rai labele sai demais para bele kobre fali pagamentu ba empréstimu”.

Sara Lobo esplika mós  sobre empréstimu ne’e iha nia limite ne’ebé tuir Fundu Monetáriu Internasionál, saida mak durante ne’e Timor-Leste foti sei iha hela limite nia okos, nune’e sei bele atu foti.

Notísia relevante : http://www.tatoli.tl/2019/06/pm-fo-hanoin-orsamentu-tenke-reajusta-ho-prioridade/

http://www.tatoli.tl/2019/06/sara-lobo-presiza-ekilibriu-iha-distribuisaun-orsamentu-hodi-reduz-dezigualdade/

Jornalista   : Maria Auxiliadora

Editór           : Francisco Simões

HAKEREK NO HATÁN

Please enter your comment!
Please enter your name here