DILI, 08 jullu 2019 (TATOLI)-Sekretáriu Estadu Kooperativa  (SECoop-sigla portugés) asina kontratu ho kooperativa sia hanesan, Kooperativa Peska Valusere, Kooperativa Produsaun Rembor, Kooperativa Multisektoral Roman Furak Fatumaka, Kooperativa Produsaun Movimentu Kamponezes Timor-Leste (MOKATIL), Kooperativa Dalan Ba Moris Di’ak, Kooperativa Turizmu Valusere,  Kooperativa Multisektoral Movimentu  Agrikultura Ekonomia Popular (MAEP) no Na’in Ba Lariwen.

Tuir komunikadu ne’ebé Ajénsia TATOLI asesu liuhusi Gabinete Mídia SECoop, ohin, katak Secoop asina kontratu ho kooperativa sia ne’e nu’udar faze dahuluk ne’ebé mak sei hetan benefisia direita ba Transferénsia Públika iha tinan 2019 nian laran.

Serimónia asinatura ne’e hala’o iha Edifísiu MTKI (Ministériu Turizmu, Komérsiu no Indústria), Mandarin, Dili, sesta (05/07/2019) no asiste direita husi Sekretáriu Estadu Kooperativa, Arsenio Pereira da Silva.

Hafoin asina kontratu, Sekretáriu Estadu Kooperativa, Arsenio Pereira hateten, kooperativa sia ne’e mak asina kontratu ba faze dahuluk no faze tuir sei halo verifikasaun ba kooperativa hirak ne’ebé submete sira-nia proposta ba SECoop maibé seidauk verifika.

“Kooperativa sia mak hetan fiar husi ekipa selesaun dokumentu no sira seluk ne’ebé seidauk verifika bainhira ekipa verifikadór tuun ba verifika tiha mak foin asina kontratu,” hateten sekretáriu estadu.

Governante ne’e informa, orsamentu Transferénsia Públika hodi apoiu kooperativa sia ne’ebé asina kontratu ho governu mak osan ho montante millaun ida resin.

“Husi fundu ne’e iha kooperativa rua mak sei hetan apoiu montante boot liu; Kooperativa MOKATIL sei benefisia ba ema hamutuk 72.000 resin no Kooperativa MAEP sei benefisia ba ema 7.000 resin,” dehan Sekretáriu Estadu Arsenio Pereira.

Asina kontratu iha faze dahuluk, kooperativa sira ne’e husi munisípiu 12 inklui  RAEOA (Rejiaun Administrativa Espesiál Oecusse-Ambeno), hodi nune’e bele hakmaan sira-nia difikuldade durante sira hasoru no haforsa atividade ekonomia iha família ka uma kain to’o nasionál.

Apoiu SEcoop nian ne’e haktuir ba Programa Oitavu Governu Konstitusionál, ne’ebé deskreve iha pájina 87, númeru 8.4 (Kooperativa).

Jornalista        : Nelson de Sousa

Editór              : Rafy Belo

HAKEREK NO HATÁN

Please enter your comment!
Please enter your name here