Ministru Reforma Lejizlativa no asuntu Parlamentár, Fidelis Manuel Leite Magalhães. Imajen Egas Cristóvão

Husi:

Ministru Reforma Lejizlativa no Asuntu Parlamentár

Fidelis Leite Magalhães

Administrasaun Públika sai hanesan parte ida ne’ebé vizivel iha nasaun independente ida ne’e, liu-husi ajénsia Estadu sira ne’ebé loron-loron halo kontaktu ho sidadaun no liu-husi prestasaun servisu sira ne’ebé nesesáriu tebes ba sidadaun nia moris. Nune’e kualidade servisu sai hanesan fatór ho importánsia estratéjika ba dezenvolvimentu sosiedade no ekonomia.

Polítika Oitavu Governu Konstitusionál ba setór públiku orienta ba prioridade atu serbí sidadaun no empreza sira ho kualidade ne’ebé aas, atu favorese kreximentu ne’ebé lais ba ekonomia no mós ba empregu, no atu konsolida soberania.

  1. Dezempeñu Administrasaun

Alende kompeténsia iha matéria Reforma Lejizlativa, lei orgánika MRLAP atribui mós kompeténsia ba Ministériu Reforma Lejizlativa no Asuntu Parlamentár atu aprezenta proposta iha matéria administrativa, ho vista ba modernizasaun no inovasaun administrasaun públika nian.

Ida ne’e permite MRLAP atu bele halo intervensaun hodi introdús perspetiva reformadora abranjente ida, hodi aprezenta proposta no solusaun konsensu sira ba prosesu mudansa ne’ebé bele ezije intervensaun lejizlativa!

MRLAP prodús ona Programa Reforma Administrativa (PRA) ba períodu tinan 2019 to’o tinan 2023,  ne’ebé hato’o ona ba Sr. Primeiru-Ministru, no sei aprezenta ba iha Konsellu Ministrus iha tempu badak, hafoin remata tradusaun ba Portugés no Tetum nu’udar Programa ba Governu hotu atu Ministériu no mós ajénsia sira bele implementa.

Objetivu husi programa ne’e maka Administrasaun Públika sei nakfilak sai administrasaun inovadora, transparente, no konveniente liu hodi hatán ba nesesidade sidadaun nian, ka bele dehan orienta liu ba iha utilizadór sira, maka sidadaun no empreza sira rasik.

Espetativa maka programa ida ne’e sei halo administrasaun sai sensivel liu iha rezultadu ba intervensaun sira, efisiente liu, ho prestasaun servisu sira ne’ebé di’ak liu no garante nafatin “value for money”!

Programa Reforma Administrativa sei fahe iha komponente ka iha área servisu komún hanesan tuir mai :

– Hadi’a prosesu prestasaun servisu

– Hadi’a prestasaun kontas (accountability ) no insentivu sira

– Hadi’a jestaun rekursu umanu

– Reestruturasaun

– Hadi’a ambiente negósiu (doing business environment)

Komponente hirak ne’e ida-ida sei iha projetu, rezultadu, indikadór, entidade implementadór, kalendáriu ba implementasaun no iha mós orsamentu.

Reforma administrativa públika sei inklui intervensaun ba área pertinente sira hanesan tuir mai ne’e :

  1. Kapasidade Institusionál : mudansa iha polítika ka iha lejizlasaun ne’ebé afeta ambiente iha ne’ebé ajénsia ida husi setór públiku hala’o servisu ba.
  2. Kapasidade Organizasionál : mudansa iha prosedimentu no iha sistema sira ne’ebé ajénsia husi setór públiku uza hodi fornese servisu, jere rekursu, no seluk-seluk tan.
  3. Kapasidade individuál : Koñesimentu no kapasidade funsionáriu ida-ida nian, hodi hala’o sira nian kna’ar ho efisiente no efikás.

Nune’e, hatudu katak reforma ka halo mudansa ba lei sira nu’udar komponente ida de’it iha esforsu importante tomak Governu nian atu hadi’a funsionamentu administrasaun públika no mós dezempeñu Funsaun Públika nian. Ida ne’e hatudu katak mudansa iha administrasaun públika rekere intervensaun lubuk ida ne’ebé presiza vizaun olístika no integrada.

  1. JESTAUN REKURSU UMANU

MRLAP iha hanoin atu hadi’a kapasidade jestaun setoriál, hodi desentraliza jestaun rekursu umanu ba iha ministériu sira;

Programa ne’e fó sai opsaun foun ida oinsá halo rekrutamentu liu-husi nomeasaun direta husi membru governu sira ba pesoál superior hodi kaer kargu diresaun no xefia. Maibé rekizitu tékniku-profisionál sira ba pesoál superior husi nomeasaun direta, sei regula ho lei no sujeita ba mekanizmu verifikasaun ba rekizitu sira husi Komisaun Funsaun Públika, atu nune’e bele iha kontrolu ba kualidade nomeasaun sira ne’e.

Programa Reforma Administrativa ida ne’e prevee mós mekanizmu sira oinsá asegura lala’ok husi prosesu nomeasaun direta, ho fiskalizasaun husi Komisaun ba Funsaun Públika hafoin nomeasaun sira ne’e hala’o atu evita paralizasaun (“halo interrupsaun”) administrativa iha prosesu hili dirijente sira.

Atu asegura katak Ministériu sira implementa ho rigor, nomeasaun direta ba dirijente sira konsidera hela opsaun prinsípiu insentivu no good practice (prátika di’ak) liu husi dalan sira hanesan tuir mai

– Posibilidade ida, porezemplu : ministériu sira ho prátika di’ak iha nomeasaun direta, sira ne’ebé kumpre ho rigor rekizitu ba kualifikasaun akadémika  no esperiénsia profisionál ba kargu nomeasaun direta, ministériu sira ne’e sei iha direitu atu simu alokasaun orsamentál re-forsada ba sira nian despeza diskrisionáriu (livre hosi kondisaun).

– Posibilidade seluk, hanesan alternativa, ministériu sira ne’ebé maka kumpre rekizitu sira ho rigor, no dezempeña prátika di’ak sei hetan klasifikasaun ho sistema pontu (valór), no hetan autonomia luan iha jestaun ba rekursu umanu, enkuantu ministériu sira ne’ebé falla dala barak iha rekizitu sira, sei lakon autonomia jestaun no sira nian rekursu umanu sei  jere no nomeadu hikas husi Komisaun Funsaun Públika.

Programa Reforma Administrasaun nian ida ne’e sei determina funsaun xave saida de’it iha jestaun Rekursu Umanu ne’ebé tenke desentraliza no tanba-sá. Funsaun atu desentralizada sira ne’e bele inklui :

– Rekrutamentu;

– Avaliasaun ba dezempeñu;

– Dezenvolvimentu ba Rekursu Umanu;

– Konfirmasaun ba payroll;

– Asaun disiplinár.

Kona-ba kompeténsia disiplinár iha alternativa posivel hanesan : desizaun atu loke inkéritu disiplinár ne’e kompeténsia Ministru ida-ida nian, maibé inkéritu ka prosesu disiplinár sira ne’e sei kondús husi Komisaun da Funsaun Públika hodi asegura nia neutralidade.

Objetivu husi programa ne’e, inklui mós ho proposta importante sira husi reforma ba prosedimentu de jestaun rekursu umanu nian ne’ebé prevee iha programa ne’e atu asegura no aperfeisoa kritériu meritokrasia (sistema promosaun) no valorizasaun ba kompeténsia profisionál.

Ita hakarak katak ema ne’ebé kontratadu ne’e kompetente duni, hanesan dala barak ita rona “pessoa certa no lugar certo”.  Iha tempu hanesan, ita mós hakarak atu asegura katak ministériu setoriál sira sei sai responsavel ba rezultadu husi nomeasaun ne’ebé sira rasik halo iha nivel rekrutamentu nian, ba jestaun no ba mós dezempeñu rekursu umanu sira ne’e nian.

Komponente prioritária ida husi komponente lima (5) ne’ebé integra iha programa Reforma maka hadi’a jestaun rekursu umanu iha Funsaun Públika. Maibé ida ne’e la taka dalan ba Komisaun da Funsaun Públika atu kontinua dezempeña nafatin papél importante iha reforma sira ba jestaun de Rekursu Umanu

MRLAP, liu-husi Gabinete ba Inovasaun Administrativa no Gabinete ba Reforma Lejizlativa, iha kondisaun sira atu fó apoiu imediatu ba Komisaun Funsaun Públika ba nia Plano Estratéjiku 2015/2030, ne’ebé iha nia implementasaun seidauk iha progresu bot, nomeadamente iha objetivu sira hanesan tuir mai ne’e :

– Ajustamentu ba estrutura no instituisaun sira en-relasaun ho mandatu no objetivu estratéjiku sira;

– Hadi’a prestasaun servisu liu-husi deskrisaun servisu nian, kna’ar, no responsabilidade ne’ebé klara;

– Klarifika kuadru legal atuál ba rekrutamentu no ba selesaun, no ba prátika respetiva sira, katak atu garante duni ema los iha fatin los;

– Preparasaun iha ministériu ketak-ketak ba jestór Rekursu Umanu kapasitadu sira;

– Servisu iha remunerasaun no motivasaun husi forsa traballu iha Administrasaun Públika;

– Garante asesu no igualdade jéneru ba feto no ba grupu sub-reprezenta sira seluk.

Komisaun ba Funsaun Públika funsiona ona tinan sanulu nia laran, tanba ne’e, normal bainhira atu reavalia fali ninian papél.

Programa Reforma Administrativa koloka posibilidade atu redús intervensaun operasionál nian, no atu reforsa funsaun reguladór Komisaun ba Funsaun Públika nian. Tuir loloos, reforma maka sei ajuda kumpre ambisaun orijinál ne’ebé maka sai razaun ba kriasaun Komisaun Funsaun  Públika, ne’ebé tuir ha’u rona, katak objetivu orijinál maka atu asegura organizmu reguladór ida. Maibé, sentralizasaun iha jestaun Rekursu Umanu ba Administrasaun Públika iha Komisaun Funsaun Públika, infelizmente, tanba iha persesaun katak iha fallansu ka falta rekursu husi ministériu sira.

Ha’u fiar katak to’o ona altura hodi halo Komisaun ne’e nakfilak sai guardian (defensór) ba meritokrasia iha ita nian Funsionalizmu Públiku, liu-husi papél hanesan reguladór ida no supervizór hodi asegura kumprimentu ba prosedimentu sira ne’ebé estabelese tiha ona, no ba kritériu rekrutamentu sira ne’ebé aplikavel.

Importante mós atu avansa ho avaliasaun detallada ida kona-ba prosedimentu ba funsaun hotu-hotu Rekursu Umanu nian tanba nia objetivu loloos maka atu garante katak sei laiha burokrasia ne’ebé exesiva. Porezemplu, iha sistema pontuasaun relasionadu ho rekrutamentu no avaliasaun ba dezempeñu ne’ebé tenke adekuadu hodi asegura efetivamente selesaun ba kandidatu ne’ebé loos.

Ipóteze ba alterasaun sira ne’e bele lori alterasaun signifikativa husi diploma sira ne’ebé reje Funsaun Públika, ho destaka ba rejime konkursu nian, rekrutamentu, selesaun no promosaun pesoál nian ba Administrasaun Públika, hanesan mós Estatutu ba Funsaun Públika, no lei ne’ebé hahoris Komisaun ba Funsaun Públika.

Proposta sira ha’u mensiona tenke liu husi estudu impaktu regulatóriu ne’ebé Governu halo ona sai obrigatóriu hodi akompaña futura proposta ba Dekretu-Lei no mós ba diploma sira hotu.

Análize alternativa no avalia sira nian impaktu maka dalan los atu bele prodús diploma legal sira ne’ebé di’ak liu, inklui mós diploma sira ne’ebé fó forma no hakarak atu promove efisiénsia kualidade ita nian Administrasaun Públika.

Antes atu refere ba iha kestaun balu ne’ebé relasiona ho reforma organizasaun no estrutura ba administrasaun públika, ha’u sei refere proposta ida ne’ebé relasiona ho posibilidade atu halo “kontratu dezempeñu nian” (performance contract) entre ministru sira ho diresaun-jerál ida-ida ka diresaun nasionál husi ministériu sira atu kontratualiza (halo kontratu) objetivu no meta sira ne’ebé diresaun sira kompromete atu kumpre, hodi kontribui ba realizasaun objetivu final global ministériu sira nian, iha períodu de tempu ne’ebé mensiona iha kontratu sira ne’e.

Kontratu sira ne’e ha’u fiar sei bele sai instrumentu poderozu (forte) iha promosaun ba planeamentu,  no mós monitorizasaun ba implementasaun no ba rezultadu sira iha departamentu Estadu nian.

III. ORGANIZASAUN NO ESTRUTURA ADMINISTRASAUN PÚBLIKA NIAN

Relativamente ba organizasaun no estrutura Administrasaun Públika nian, nesesáriu duni atu intervein hodi bele estabelese regra sira ne’ebé klara kuandu ba kritériu kriasaun servisu nian  no ba Institutu Públiku sira.

MRLAP sei aprezenta proposta diploma orgánika ida ba efeitu ida ne’e. Iha tempu hanesan, tenke garante mós armonizasaun ida ne’ebé adekuada iha orgánika ministériu sira nian, atu asegura sei laiha sobre pozisaun iha atribuisaun no kompeténsia sira.

MRLAP hakarak atu reforsa iha kada orgánika, atitude ne’ebé sei dirije atu serbí di’ak liu tan utilizadór servisu públiku sira hotu – sidadaun no empreza sira.

Ba ida ne’e atu akontese, MRLAP presiza simplifika sistema no prosesu atendimentu sira, no hasa’e satisfasaun sidadaun sira nian. Hadi’a mós ambiente negósiu nian, katak sei halo di’ak rede kooperasaun entre servisu públiku ho setór privadu no ajénsia sira seluk.

Modernizasaun administrativa no melloramentu ba prestasaun servisu ba sidadaun no empreza sira presiza servisu hamutuk ho instituisaun seluk. Iha perspetiva ida ne’e, MRLAP komesa servisu hamutuk ona ho Ministériu Justisa no TIC TIMOR iha projetu ida ne’ebé sei lansa ho baze E-government hodi bele apoia tan SERVE iha sira nian konsolidasaun, hodi buka atu simplifika no hadi’a prosesu rejistrasaun no lisensiamentu ba atividade ekonómika sira.

Ha’u termina hodi afirma dala ida tan ba membru tomak husi ita nian funsaun públika katak Governu hatene momoos kona-ba dezafiu sira ne’ebé mosu iha prosesu reforma no inovasaun iha administrasaun públika. Ida ne’e inklui iha konsiénsia ida klaru kona-ba dezafiu no obstákulu ne’ebé funsionáriu sira rasik enfrenta iha sira nia vida profisionál atu avansa ho servisu iha departamentu sira

Governu mós kompriende katak sei la iha profisionalizmu se la hadi’a kondisaun servisu ne’ebé di’ak.

Nune’e, Reforma Administrativa katak la’ós de’it nu’udar prosesu ida ne’ebé importante ba dezenvolvimentu maibé mós hanesan prosesu ida ne’ebé indispensável iha esforsu hodi hametin liu tan funsionáriu públiku sira nian prestíjiu iha sidadaun nia matan. (*)

HAKEREK NO HATÁN

Please enter your comment!
Please enter your name here