Seminariu kona-ba diskriminasaun boot ba ema ho Lésbia, Bissexuál, Gay, Transjender no Inter-seksu (LBGTI) iha Salan CNE, Segunda (08/07/2019). Imajen/Osória A. Marques

DILI, 08 jullu 2019 (TATOLI)-Realidade iha sosiedade Timor-Leste bele dehan, sei iha diskriminasaun boot ba  ema ho Lésbia, Bissexuál, Gay, Transjender no Inter-seksu (LBGTI).

Atu iha igualdade moris iha sosiedade ida ne’e no la bele iha diskriminasaun entre ema ho ema no sosiedade ho ema ho LGBTI sira maka presiza duni iha kontribuisaun husi Governu atu bele nakloke mós ba nia sidadaun sira LGBTI.

Liuhusi semináriu ne’ebé hala’o iha salan Comissão Nacionál das Eleições (CNE), ohin, atu sosializa informasaun ne’ebé mak kle’an liu tan ba sosiedade timorense, liuliu ba komunidade LBGTI tanba LBGTI barak mak lahatene sira-nia moris hanesan ne’e entaun sira rasik dúvida ba sira-nia aan katak tanbasá mak sira moris hanesan ne’e.

“Ho ida ne’e ami husi ARCOIRIS hamutuk ho CODIVA, BUIMAU TL, Women Right no HATUTAN atu oinsá hasae sira-nia komprensaun no vulnerabilidade sira husi grupu juventude balu ne’ebé mak espesífiku no dezafiu sira ne’ebé mak sira enfrenta,” informa porta vos ARCOIRIS  TL, Bella Galhos, iha ámbitu semináriu ne’e.

Bella Galhos fó sasin katak, durante tinan naruk nia laran komunidade  LBGTI nunka eziste tanba ignorante no realidade sosiedade nia perspetiva ba LBGTI nunka di’ak, laloos no la normal.

“Ha’u lidera komunidade LBGTI sira ne’ebé mak la hatene hakerek no la hatene lee ha’u hanorin sira iha uma no ajuda halo sira-nia gerobakhodi halo negósiu tanba sira-nia inan-aman sira ho perspetiva laloos ona ba sira no la konsege investe ba oan hanesan edukasaun ho ida ne’e mak ami-nia luta ba daudauk nian husi ARCOIRS TL,” hateten Bella Galhos.

Bella hateten, dala barak ona sira levanta atu bele iha igualdade moris LGBTI nian, maibé  ema barak mak la preokupa tanba buat ne’ebé mak ema dehan mane ho mane kaben no feto ho feto kaben ne’e la’ós fasil  maibé fasil.

“Ne’e la’ós ha’u-nia preokupasaun, ha’u-nia preokupasaun mak oinsá bele haree ema hotu hanesan no envolve ema hotu-hotu iha dezenvolvimentu i la haree ba ema ne’e kaben ou lae,”  Bella Galhos tenik.

Durante ne’e, nia haree katak, governu nunka nakloke entaun ho Tópiku “Kometimentu Governu atu Asegura Inkluzaun Sosiál to’o iha ne’ebé ona?, hodi bele inkluzivamente envolve ema hotu iha dezenvolvimentu.

“Iha realidade ne’e, ami uza mesak ami-nia osan hodi selu labarik sira-nia eskola no mós ami haruka sira ba rai li’ur tuir treinamentu nune’e mos bolsu estudu  uza osan rasik,” hateten Bella Galhos.

Nia  rekomenda ba governu liuliu ba Sekretária Estadu Igualdade no Inkluzaun (SEII) atu nakloke ba ema hotu katak laiha joven ida mak hela iha kotuk Timor-Leste,”.

“Há’u mos konsege ko’alia ona sira-nia inan-aman ho didi’ak no inan-aman mos bolu fali ona sira-nia oan ba hela hamutuk ho sira entaun ho ida ne’e  ha’u sujere nafatin katak ema hotu tenke envolve iha dezenvolvimentu labele haree de’it katak ema hotu-hotu iha direitu hanesan, maibé nunka nakloke ba ema hotu no nunka implementa programa sira ne’e,” Bella hateten.

Oradores ba seminário ne’e hamutuk na’in lima hanesan Provedoria Direitos humanos e Justiça (PDHJ), Jesuina Gomes, Eis Provedár PDHJ, Silveiro Pinto Baptista, Padre Martinho Gusmão, Carmeneza dos Santos Monteiro no Laura Pina.

 Jornalista          : Osória A. Marques

Editór                : Francisco Simões

HAKEREK NO HATÁN

Please enter your comment!
Please enter your name here