DILI, 8 jullu 2019 (TATOLI)—Treinadór nasionalidade portugés, Fabiano José Flora, ne’ebé Federasaun Futeból Timor -Leste (FFTL) fihir hodi sai treinadór ba Selesaun Nasionál U-23, asina ona kontratu ho FFTL atu hahú nia atividade.

Kontratu ne’ebé FFTL fó durasaun fulan 6 hodi haree bainhira hatudu rezultadu di’ak hafoin bele extende tan.

Fabiano José Flora informa, FFTL fó ona konfiansa, nia tenke simu konfiansa ne’ebé iha ho responsabilidade nune’e bele hadi’a futeból iha Timor-Leste.

“Ha’u agradese tebes ohin hasoru malu ho Prezidente Federasaun Futeból Timor-Leste (FFTL) hodi asina ona kontratu. Ida ne’e responsabilidade ida ba oin ha’u tenke serbisu maka’as nune’e bele hadi’a futeból Timor-Leste,” dehan Fabiano ba Agência Tatoli iha edifisiu FFTL, Bairru Formosa, Dili, ohin.

Serbisu dahuluk ne’ebé Fabiano halo mak sei prepara jogadór 20 hodi partisipa iha eventu internasionál Sea Games ne’ebé sei hala’o iha Manila-Filipina, novembru mai ne’e.

“Iha kinta mai ne’e ha’u hahú halo serbisu ona, hodi prepara jogadór sira ba Sea Games,” tenik Fabiano. Kontratu ne’ebé FFTL haraik ba nia kada fulan dolar rihun rua atus-lima ($2500).

Haree ba dezenvolvimentu futeból iha Timor-Leste la’o seidauk di’ak, treinadór foun ne’e dehan, atu hadi’a futeból iha Timor-Leste labele krítika malu de’it maibé hamutuk serbisu maka’as hafoin bele lori rezultadu di’ak.

Entretantu, maski kaer ona Selesaun Nasionál maibé treinadór refere kontinua kaer nafatin klube Boavista FC Timor.

FFTL fó konfiansa ba Fabiano tanba iha esperiénsia ne’ebé másimu no iha sertifikadu profisionál UEFA grau ‘A’ ne’ebé mak hala’o ona nia kareira hanesan treinadór hafoin hetan esperiénsia hosi ekipa koñesidu iha Europa hanesan Académica, Lazio, Juventus, PSG, MU, SLB Benfica, no sai mós treinadór prinsipál iha klube Primeira Divizaun Myanmar no mós Selesaun Nasionál Myanmar nian.

Jornalista: Hortençio Sanchez

Editór: Xisto Freitas

HAKEREK NO HATÁN

Please enter your comment!
Please enter your name here