DILI, 08 jullu  2019 (TATOLI)– Jurista timoroan Eustaquio Guterres, sujere ba Estadu Timor-Leste (TL), liuliu governu atu akompaña prosesu investigasaun ba kazál timoroan lori droga tanba difisil tebes atu lori fila sira na’in rua mai julga iha TL.

Defensor Públiku nee  hateten, durante nee nia parte akompaña hela lei estranjeiru sira, liuliu Indonézia nian ne’ebé rigor teb-tebes ba kazu droga. Tanba nee mak husu ba estadu presiza halo akompañamentu ne’ebé mós rigor atu bele salva kazál Timoroan ne’e husi akuzasaun “hukuman seumur hidup” ou “hukuman Mati” (pena morte).

“Ha’u husu ba estadu TL tenke serbisu makaas no akompaña prosesu investigasaun ho  prosesu justisa iha Indonézia, atu bele halo lobi polítika ou diplomasia, para hetan solusaun ba kazu refere,” hateten Estaquio Guterres, ohin, ba Ajénsia TATOLI iha  Tribunal Distritál Dili (TDD).

Nia parte mós husu ba Estadu TL atu lalika interfere demais liu ba ema nia justisa, se lae liu husi ema nia lei,  bele aplika pena morte (hukuman mati).

Dalan ne’ebé mak jurista nee propoin mak tenke tau advogadu husi TL atu serbisu hamutuk ho advogadu Indonézia atu parte rua nee, bele komunika no estuda kazu nee. Nune’e, bainhira aplika pena karik ho kmaan.

Hatán kona-ba posivel  Estadu TL bele asesu prosesu iha Indonézia, Estaquio esplika, talvés labele asesu diretamente, maibé dalan ne’ebé di’ak liu mak Estadu tenke hanoin no prepara ona advogadu TL ho Indonézia atu defende kazál Timoroan lori droga.

Dalan seluk atu rezolve, Estaquio tenik, halo lobi polítika liuhusi Ministériu Justisa no Ministériu Negósiu Estranjeiru no Kooperasaun halo diálogu ho autoridade rua nee, maibé depende fila fali ba Indonesia.

“Ha’u sente sai perigu no todan tebtebes, se ita labook aan, tanba bele hetan kastigu pena morte (hukuman mati) tanba ne’e importante duni atu Estadu TL akompaña nia prosesu too remata,” Estaquio Guterres tenik.

Jornalista   : Domingos Piedade Freitas

Editór        : Francisco Simões

HAKEREK NO HATÁN

Please enter your comment!
Please enter your name here