Espoza Saudozu Komandante Samba Sembilan (9), Manuela Pereira Ribeiro, oan ki'ak no família partisipa serimónia funerál Saudozu Samba Sembilan nian iha semitériu Jardín Eroi Metinaro Dili, Sábadu (06/07/2019). Imajen/ Eugénio Pereira

METINARO, 07 jullu 2019 (TATOLI)-Prezidente Repúblika, Francisco Guterres Lú Olo  dehan, Estadu Timor-Leste iha obrigasaun boot atu tau matan ba família oan kiak husi Saudozu Komandante Jaime Ribeiro “Samba Sembilan (9)” tuir lei.

Lú Olo dehan, durante sei moris, Saudozu Samba Sembilan nunka hanorin nia oan sira atu ezije ba Estadu ba luta ne’ebé nia dedika ona too nia hakotu iis.

“Ha’u hatene katak, nia (Samba) tau hela hanoin ba nia oan sira nia hanoin katak, oan sira labele husu. Ha’u hakarak atu hataan de’it ba ida ne’e. Komandante Samba Sembilan fó hotu tiha ona saida maka nia bele fó ba rai ida ne’e, ba povu ida ne’e. Mais hanesan Estadu, ha’u hakarak atu hatete de’it, Estadu so kumpre de’it ninia obrigasaun boot tuir lei Estadu nian para bele husik hela re-koñesimentu boot ida para oinsá bele lori komandante Samba ninia oan ki’ik-oan sira ne’e bele moris ba oin nafatin tuir lei Estadu nian,” dehan Lú Olo iha diskursu serimónia funerál Saudozu Komandante Samba Sembilan iha Semitériu Jardín Eroi Metinaro, Dili, sábadu (06/07/2019).

Antes ne’e, Espoza Saudozu Samba Sembilan, Manuela Pereira Ribeiro dehan, atu husu Estadu Timor-Leste tau  matan ba família, sira sei la husu, tanba durante sei moris Saudozu Samba Sembilan fó kontribuisaun boot ba luta ba independénsia Timor-Leste nian.

Jornalista   : Eugénio Pereira

Editór         : Francisco Simões

HAKEREK NO HATÁN

Please enter your comment!
Please enter your name here