DILI, 8 jullu 2019 (TATOLI)—Prezidente Komisaun B trata Asuntu Negósiu Estranjeiru, Defeza no Seguransa, Adérito Hugo da Costa, rekomenda ba instituisaun relevante sira ne’ebé iha kompeténsia ba kestaun justisa atu kontinua loke prosesu investigasaun profunda hasoru elementu sira ne’ebé involve iha rede droga para bele hatán aktu ne’ebé sira halo ona.

Rekomendasaun ne’e bazeia ba aktu krimi ne’ebé mak komete husi funsionáriu Alfándega no sidadaun estranjeiru Filipina ne’ebé hamonu ona imajen Timor-Leste (TL) nian iha Rejiaun Sudeste Aziátiku tanba fó ona dalan ba sidadaun timoroan na’in rua ultrapasa fronteira terrestre TL ikus mai kaptura iha área jurisdisaun Indonesia nian iha fronteira Mota-Ain.

Deputadu ne’e husu ba Ministériu Públiku atu nafatin akompaña prosesu justisa Indonézia nian hasoru kazál timoroan ne’e nian para bele fortifika investigasaun hasoru mós autór sira iha Timor-Leste.

“Ita hotu hatene katak Indonézia prosesa ona ita-nia sidadaun na’in rua tanba lori droga ultrapasa ita-nian fronteira. Tan ne’e, ami mós rekomenda ba autór sira iha TL mós tenki hetan investigasaun ida profunda nune’e labele repete tan aktu ne’e,” tenik nia iha Parlamentu Nasionál, ohin.

Eis Prezidente Parlamentu Nasionál ne’e realsa katak oras ne’e dadaun prosesu justisa TL nian mós la’o dadaun hasoru elementu sira ne’e maski seidauk iha desizaun final, tan ne’e nia husu desizaun ne’ebé Tribunál sei foti tenke reprezenta duni hanoin ema hotu nian ka desizaun ida justu no loloos.

Nia haktuir, kuandu kazu ne’e akontese, Adérito afirma, sira halo kedas audiénsia ho Komandante Jerál Polísia Nasionál Timor-Leste, Komisáriu Faustino da Costa, maibé esplikasaun ne’ebé sira hetan katak PNTL akompaña de’it prosesu ne’e tanba laiha dalan atu interven iha serbisu POLRI (Polisi Republik Indonesia) nian.

“Portantu, serbisu sira ne’e kompeténsia governu TL mak tenki halo oinsá atu aprosima para bele hetan dalan,” Hugo afirma.

Jornalista : Tomé Amado

Editór: Xisto Freitas

HAKEREK NO HATÁN

Please enter your comment!
Please enter your name here