DILI, 08 jullu 2019 (TATOLI) – Governu liuhosi reuniaun Konsellu Ministru estraordinária segunda ne’e, rona aprezentasaun no aprova Proposta Alterasaun Lei husi Xefe Negosiadór Prinsipál ba Delimitasaun Fronteira Marítima, Kay Rala Xanana Gusmão ho ninia ekipa, no aban sei ba submete iha Parlamentu Nasionál (PN) hodi ajenda no debate.

Ministru Estadu Prezidénsia Konsellu Ministru, Agio Pereira hateten, aprezentasaun detalladu ohin husi Xefe Negosiadór ho espesialista sira husi Autoridade Nasionál petróliu no Minerál (ANPM) no Ministériu Finansa (MF).

Ministru Estadu Prezidénsia Konsellu Ministrus
Hermenegildo Augusto Cabral Pereira. Imajen/Antonio Goncalves

“Konsellu Ministru rona no aprova Proposta Alterasaun Lei ne’ebé ita tenke altera no Konsellu Ministru sei prepara aban dader hodi hatuun ba Parlamentu Nasionál. Tanba lei sira tenke liu Parlamentu Nasionál no hato’o ba Prezidente Repúblika (PR) hodi promulga”, tenik Ministru Agio Pereira iha Palásiu Governu.

Ministru Agio informa, Proposta Alterasaun Lei hirak ne’e mak Lei Tributária no Lei Fundu Petrolíferu.

“Tenke muda tanba lei sira ne’e halo kontestu Zona Konjunta Dezenvolvimentu Petrolíferu (JPDA) nia hanesan akordu tranzisaun ba esplorasaun konjunta,” katak Ministru Agio Pereira.

Governante ne’e informa, bainhira PN konsege ratifika tratadu iha loron 30 agostu no  lori ba  PR hodi publika, hahú ona tratadu foun ho Fronteira Marítima permanente no  mapa ne’ebé iha tratadu hanesan Timor-Leste nia mesak ona hanesan territóriu soberanu.

“Akordu hotu ho kompañia Petrolífera hanesan ConocoPhillips, Woodside, Bayu Undan, Kitan, Buffalo, ne’ebé iha akordu ne’e tama iha Timor-Leste nia territóriu, kontratu sira ne’e tenke hadi’a no ajusta hodi aserta ho tratadu Fronteira Marítima permanente,” nia akresenta.

Xefe negosiadór prinsipál ketan tasi, Kay Rala Xanana Gusmão Hasoru Malu Primeiru-Ministru, Taur Matan Ruak,iha Palásiu Governu. Dili,Segunda, (08/07/2019).

Tuir nia, akordu Timor-Leste ho kompañia petrolífera sira ANPM mak lidera ona durante fulan neen nia laran hanesan Transitional Arrangement,  hodi diskute ho governu Austrália ho kompañia sira hotu kona-ba kontratu hodi hetan konkordánsia ida-idak nia, hafoin hetan konkordánsia koletiva.

“Agora ita-nia objetivu mak laiha oras ida, ita halo ona ratifikasaun tratadu maibé kompañia ida seidauk iha kontratu atualizadu no ajustadu. Servisu ne’e detalladu tebes no maka’as, ANPM lidera servisu ho Xefe Negosiadór,” nia informa tan.

Nia dehan tan, aban lorokraik Konsellu Ministru Kontinua haree de’it Dekretu-Lei sira.

“Dekretu-Lei ne’e la presiza hatuun ba Parlamentu Nasionál no haruka los deit ba Prezidente Repúblika hodi hetan promulgasaun no publikasaun,” nia akresenta.

Jornalista: Julia Chatarina

Editór.     : Rafy Belo

HAKEREK NO HATÁN

Please enter your comment!
Please enter your name here