Xefe Estadu Maiór Jenerál F-FDTL, Majór Jenerál Lere Anan Timur. Imajen/Eugénio Pereira

METINARO, 07 jullu 2019 (TATOLI)-Xefe Estadu Maiór Jenerál FALINTIL-Forsa Defeza Timor-Leste (F-FDTL), Majór Jenerál Lere Anan Timur,  sei propoin ba Prezidente Repúblika, Francisco Guterres Lú Olo ho Primeiru-Ministru, Taur Matan Ruak, atu bolu lider organizasaun arte marsiál sira tuur hamutuk halo diálogu para buka solusaun problema sira durante ne’e.

Lere lamenta too agora grupu organizasaun arte marsiál kontinua ataka malu iha Aldeia Baura, Suku Leorema, Postu Administrativu Bazartete, Munisípiu Liquiça , ne’ebé  hamate ema na’in rua no sunu uma 13, inklui motór hitu.

“Ha’u sei propoin ba governu no presidente repúblika atu bolu lider arte marsiál ninia boot sira ne’e mai. Sira nia ema ne’e sira kontrola ka ou krime organizadu,” afirma Lere Anan Timur ba jornalista iha Jardín Eroi Metinaro, Dili, sábadu (06/07/2019).

Komandante F-FDTL apela ba joven sira atu para halo krime no violénsia, tanba oho malu no asaltu malu tempu liu ona, tanba tuir Lere agora tempu atu hamutuk dezenvolve   Timor-Leste hodi fó moris ba família idak-idak.

Nia dehan, se mak halo krime ninia dalan rua de’it; ida, ba komarka Becora no seluk fali mak ba semitériu  ne’ebé sei lori sofrimentu boot ba família tanba lakon nia ema.

Parte seluk, Lere alerta ba membru F-FDTL no PNTL atu labele envolve aan iha grupu organizasaun arte marsiál, tanba Komandu F-FDTL no PNTL identifika sei hasai husi serbisu.

Jornalista   : Eugénio Pereira

Editór          : Francisco Simões

HAKEREK NO HATÁN

Please enter your comment!
Please enter your name here