Ezemplu lixu sira ne'ebé namkari iha kapitál. Imajen Egas Cristovão

DILI, 4 jullu 2019 (TATOLI)—Governu liuhusi Sekretaria Estadu Ambiente (SEA) oras ne’e sosializa ba líder komunitáriu hamutuk 16 mai hosi Munisípiu Aileu (Aileu villa), Dili ( Dom Aleixo no Kristu Rei), Baucau (Laga), Bobonaro (Bobonaro Vila) kona-ba oinsá atu prevene akontesimentu puluisaun ba ambiente no soe lixu dook hosi komunidade no mós fahe saku bornál ba líder komunitária hirak ne’e.

Hafoin sosializasaun, tékniku superiór Sekretáriu Estadu Meiu Ambiente, António Lelo Tasi, hateten hosi distribuisaun saku bornál ba xefi suku 16, hanesan parte ida hosi sensibilizasaun edukasaun meiu ambientál.

Tanba, tuir nia, oras ne’e dadaun polítika governu liuhosi Sekretaria Estadu Meiu Ambiente lansa ona programa ida zero plástiku no oras ne’e SEA prepara hela Ezbosu Dekretu Lei ida bandu Timor-Leste ba futuru sei la simu tan importasaun plástiku hosi rai li’ur. Tan ne’e, komunidade tenke iha konsiénsia rasik bainhira ba supermerkadu bele uza de’it saku bornál.

“Ne’e hanesan símbolu ida atu sensibiliza liuhusi xefi suku sira atu bele sensibiliza tutan ba komunidade iha área rurál,” Anónio ba jornalista sira hafoin distribui saku bornál iha salaun auditória Institutu Defeza Nasionál (IDN ), Kolmera, Dili, kinta (4/7).

Nia hato’o agradesimentu ba Institutu Nasionál Defeza ne’ebé konvida SEA hodi fahe informasaun ambientál ba xefi suku sira.

Tuir nia, xefi suku sira hanesan matan no tilun governu sentrál iha suku ida-idak, nune’e husu ba lidér komunitáriu atu fahe tutan importánsia meiu ambiente saudável ba komunidade iha área rurál.

Iha fatin hanesan, Xefi Suku Nunira, Postu Administrativu Laga, Munisípiu Baucau, Nilton de Sousa Gama, apresia ho polítika IDN ne’ebé fó oportunidade ba autoridade lokál sira mai hetan formasaun seguransa no defeza nasionál, edukasaun sidadania, administrasaun poder lokál ho meiu ambiente hosi oradór sira.

“Formasaun ne’e lori benefísiu ba ha’u pesoál, tanba pelumenus ha’u kompriende netik kona-ba matéria seguransa no defeza nasionál, edukasaun sidadania, administrasaun poder lokál, meiu ambiente hosi konjunta oradór sira. Ha’u sei hatutan ba komunidadade hodi bele kompriende mós,” nia haklaken.

Kona-ba saku bornál ne’ebe nia simu, líder kominitáriu ne’e konsidera katak ne’e importante hodi redúz netik lixu orgániku iha rai laran, maibé husu SEA tenki halo sosializasaun to’o iha terenu para hasa’e komunidade nia kompriensaun.

Aleinde ne’e, Xefi Suku Culuhun, Postu Administrativu Kristu Rei, Munsípiu Dili, Deus Dado Martins, konsidera polítika zero plástiku ne’ebe governu SEA trasa presiza sosializa ativu to’o terenu, hodi hasa’e sosiedade nia konsiénsia.

Jornalista: Felicidade Ximenes

Editór: Xisto Freitas

HAKEREK NO HATÁN

Please enter your comment!
Please enter your name here