Francisco Araújo

DILI, 6 jullu 2019 (TATOLI)—Treinadór prinsipál Assalam FC, Francisco Araújo husik ona klube Assalam FC tanba lori Assalam lakon dala rua ho ekipa seluk iha jogu Primeira Divizaun époka 2019.

“Ha’u husik Assalam tanba bazeia ba kontratu ne’ebé mak ha’u halo ho klube, tanba ha’u-nia lideransa lori Assalam lakon dalarua iha jogu Primeira Divizaun entaun klube buka fali treinadór foun. Ida ne’e la sai dezafiu ba ha’u hodi termina ha’u nia kareira hanesan treinadór,” tenik Francisco ba Agência Tatoli iha Kampu Federasaun Futeból Timor-Leste (FFTL), Bairru Formosa, Dili, ohin.

Husik Assalam, Francisco hetan oportunidade hodi fila hikas ba klube anteriór ne’ebé altura ne’ebá haboot nia naran iha mundu futeból, mak YMCA FC.

Francisco daudauk ne’e buka meiu hela oinsá bele lori klube refere hosi Terseira Divizaun fila hikas ba Segunda Divizaun.

Antes ne’e, YMCA monu hosi Segunda Divizaun ba Terseira Divizaun iha époka 2017 hamutuk ho CAFÉ FC no Benfica Dili.

“Agora ha’u fila fali ba ha’u nia klube uluk (YMCA). Ha’u agora buka esforsa-án maka’as nune’e iha tinan ida ne’e bele lori klube ne’e fila hikas ba Segunda Divizaun,” nia promete.

Entretantu, dadaun ne’e Francisco hetan ona sertifikadu treinadór nian hosi Asian Football Confederation (AFC) grau C iha 2017. Iha tinan 2017, Francisco hetan fiar hosi klube Atlético Ultramar hodi sai hanesan asistente treinadór konsege lori duni Ultramar sai kampiaun ba Tasa 12 de Novembro.

Nia husik Ultramar iha 2018 no hetan fiar fali hosi klube Zebra FC hodi sai hanesan asistente treinadór hodi defende klube refere, tan ne’e la konsege tuun ba Terseira Divizaun.

FFTL mós fó ona konfiansa ba treinadór timoroan hamutuk 20 inklui Francisco, ne’ebé iha tempu besik sei ba hasai tan sertifikadu trainadór nian grau B hosi AFC nune’e bele aumenta tan kapasidade treinadór sira nian.

Jornalista: Hortençio Sanchez

Editór: Xisto Freitas

HAKEREK NO HATÁN

Please enter your comment!
Please enter your name here