Komunidade akompaña saudozu Samba-Sembilan nia prosesu funerál iha Jardim dos Herois Metinaro, ohin. Imajen Tatoli/Evaristo Soares Martins

METINARO, 6 jullu 2019 (TATOLI)—Ema rihun ba rihun akompaña saudozu Jaime Ribeiro alias Samba-Sembilan ba haloot iha Jardim dos Herois Metinaro, Postu Administrativu Metinaro, Munisípiu Dili, ohin.

Hahú hosi Ulmera, Tibar, Tasi Tolu, Comoro, Vila-Verde, Bidau, Becora, Fatuahi, Hera no Metinaro, komunidade entusiazmu akompaña saudozu nia mate-isin iha dalan-ninin.

Komunidade akompaña saudozu Samba-Sembilan nia mate-isin hosi Ulmera to’o iha Jardim dos Herois Metinaro, ohin. Imajen Tatoli/Evaristo Soares Martins

Tuir estimasaun, komundade kuaze rihun-lima resin mak akompaña mate-isin Samba-Sembilan hahú hosi Dili to’o Metinaro. Ema hirak ne’e mai hosi veteranu, Komisaun Omenájen, juventude reziténsia, juventude baibain, membru governu, funsionáriu públiku, populasaun balun ne’ebé barak liu mai hosi Munisípiu Liquiçá.

Pridezente Konsellu Juventude Munisípiu Liquiçá, Laurindo dos Santos, ne’ebé organiza komunidade hosi Munisípiu Liquiçá, hateten saudozu Samba-Sembilan manu-aman di’ak ida, tanba ne’e Liquiçá oan sira tenke soe tempu ba loron ohin.

“Liquiçá oan sira, loron ohin ita hotu tenke akompaña hahú hosi rezidénsia Ulmera to’o Jardim dos Herois Metinaro, tanba Liquiçá nia manu-aman di’ak ida partisipa iha funu ba prosesu libertasaun nasionál to’o manán liberdade,” Xefe Juventude Munisípiu Liquiçá ne’e aviza bainhira akompaña mate-isin saudozu sai hosi rezidénsia Ulmera, Postu Administrativu Bazartete, Munisípiu Liquiçá, sábadu ne’e.

Laurindo dehan, loron sábadu hanesan loron ikus komunidade Munisípiu Liquiçá hamutuk ho saudozu Samba-Sembilan.

Tuir observasaun Agéncia TATOLI, família sira lori saudozu Samba-Sembilan sai hosi rezidénsia Ulmera, liuhosi Komité Sentrál FRETILIN (CCF-sigla portugés), misa iha Katedrál Dili no ikus iha Jardim dos Herois Metinaro, nu’udar fatin ikus ba saudozu.

Jornalista: Evaristo Soares Martins

Editór: Xisto Freitas

HAKEREK NO HATÁN

Please enter your comment!
Please enter your name here