Semináriu ho tópiku: “Jornalizmu, Lei no Direitu iha Funu”, organiza hosi Asosiasaun Jornalista Timor-Leste (AJTL) no Komité Internasionál Krúz Vermelha (ICRC-sigla ingés). Imajen espesiál

DILI, 5 jullu 2019 (TATOLI)—Asosiasaun Jornalista Timor-Leste (AJTL) no Komité Internasionál Krúz Vermelha (ICRC-sigla ingés), organiza semináriu loron ida kona-ba Jornalizmu, Lei no Direitu iha Funu, ho objetivu atu hasa’e koñesimentu jornalista iha área konflitu.

Prezidente Asosiasaun Jornalista Timor-Leste (AJTL), David Hugo esplika semináriu ida ne’e ho misaun oinsá mak bele promove jornalista sira sai profisionál.

Partisipante sira hasai foto hamutuk iha semináriu ho tópiku: “Jornalizmu, Lei no Direitu iha Funu”, organiza hosi Asosiasaun Jornalista Timor-Leste (AJTL) no Komité Internasionál Krúz Vermelha (ICRC-sigla ingés). Imajen espesiál

“Ne’e parte hosi ami-nia hanoin atu aumenta jornalista sira-nia kapasidade liuhosi semináriu sira ne’ebé mak iha, no liuhosi formasaun sira ne’ebé mak iha. Entaun, semináriu sira ne’e halo parte ida hosi esforsu sira ne’ebé mak iha atu halo hodi hasa’e kapasidade jornalista nian liliu iha tópiku kona-ba direitu jornalizmu iha lei no funu, katak oinsá atu halo kobertura iha área konflitu sira,” nia dehan iha semináriu refere iha JL-Villa, Fatuhada, sesta (5/7).

Iha fatin hanesan, responsável Internasional Comite the Red Cross (ICRC) iha Timor–Leste, Joao Martins Soares, hateten formadaun ba lei, umanitária internasionál ne’e mós papél importante ba Krúz Vermella iha mundu tomak liliu iha Timor-Leste.

Nune’e mós, Komisáriu Konsellu Imprensa (CI-sigla portugés), Francisco Belo Simões, hateten matéria sira ne’ebé introdúz ona iha semináriu ne’e jornalista sira tenke aproveita ho di’ak, sai hanesan bukae ida ba jornalista sira iha futuru, hodi hetan fiar atu ba kobertura iha zona konflitu.

“Maski iha tinan 2006-2007 mosu krize polítika no krize militár iha Timor, maibé la tau jornalista iha risku. Ida ne’e sai hanesan valór atu apriende no prepara banhira hasoru situasaun konflitu, jornalista hatene planu oinsá no asaun saida mak atu foti,” nia esplika.

Oradór ba semináriu ne’e mai hosi jornalista seniór hosi Mídia Kompas Indonézia, Josie Susilo Hardianto no reprezentante ICRC, Sonny Nomer, hodi fahe esperiénsia kona-ba estratéjia kobertura no serbisu umanitária iha konflitu ka funu laran.

Jornalista ne’ebé partisipa iha semináriu refere mai hosi Rádio e Televisão de Timor-Leste (RTTL), Grupo Média Nacional (GMN), Rádio Televisão Maubere (RTM), Jornál Dili Post, Rádiu Komunidade hosi Munisípiu Liquiçá, Baucau, Aileu no mídia sira seluk, inklui membru Asosiasaun Jornalista Timor-Leste (AJTL).

Jornalista: Felicidade Ximenes

Editór: Xisto Freitas

HAKEREK NO HATÁN

Please enter your comment!
Please enter your name here