DILI, 6 jullu 2019 (TATOLI)—Ema perigu no matenek bele lakon dala-dala, maibé nia só bele lakon [para] wainhira nia mate tiha ona. Mate nu’udar luta ida-nia ninin, vitória ida-nia rohan no sai odamatan moris [foun] ida-nian.
Iha nia moris tomak, durante tinan 24 nia laran, nia reziste [Resistir e Vencer!] iha ailaran luta hasoru invazór no rezime boot Soeharto [Indonézia], nia hanesan Maun Abut ida ne’ebé perigu no matenek, ne’ebé lakon dala-dala iha inimigu sira-nia estratéjia maibé nia nunka lakon nia abut atu hamrik metin hodi luta no luta, to’o hadau ukun rasik-án.
Hanesan ai-abut ne’ebé nia abut namlele no dodok, maski atu mate, nia fó hela mahon no hamahon ba Maun Abut na’in rua (Kay Rala Xanana Gusmão no Taur Matan Ruak) hodi halo estratéjia to’o sira hamutuk hodi halo ‘rai-nia naran’, povu no Timor-Leste nia naran sai povu no rai ida ne’ebé moris ho dignidade hanesan nasaun, Repúblika Demokrátika Timor-Leste (RDTL).
Iha ai-mahon RDTL nia okos ba, Maun Abut ida ne’e ninia istória luta ba ukun rasik-án no luta atu hasai povu hosi mukit, la tuir mehi no esperansa ne’ebé nia hakarak. Hanesan ai-hali lulik ida ne’ebé nia tahan sira monu namtati tanba anin boot, nia sanak sira maran dekor tanba loron manas be hanas, nia hún mate tanba karik nia abut sira namlele no dodok ona.
Hanesan Maun Abut ne’ebé timoroan sira bolu duni hanesan Maun Abut loloos, Maun Boot nia viajen moris fó inspirasaun ba ema wa’in. Maibé inspirasaun ne’e, hanesan ai-hún ida, to’o tempu nia sei la fó mahon no la hamahon ona ninia moris rasik. Hanesan ai-sanak ida tohar hosi nia hún, Maun Abut nia peregrinasaun [moris] mós tohar no monu hakuak rai ho hakmatek.
Maun Abut, Jaime “Samba-Sembilan”, ne’ebé moris iha loron 15 fulan abríl 1959 ne’e, ninia viajen moris suli nakonu ho istória luta ida-nian be moris no buras iha jerasaun ida ba jerasaun ida seluk, oras ne’e hela de’it hanesan istória ida. Tanba, Maun Abut be sai hanesan istória ne’e nia na’in loloos, haloot iis hodi fila hikas ona ba Aman Maromak Nia kadunan santu (domingu, 30 juñu 2019) hodi moris hamutuk ho santu sira iha lalehan.
“Katuas monu purvolta tuku 19.30 hanesan ne’e. Nia monu ferik sai mai hiit nia, ninia iis ne’e ki’ik ona. Ami hein ambulánsia mós kle’ur, entaun primu balun lori hela karreta estadu, entaun iha tuku 21.00 resin ami sai hosi Ulmera lori ba Hospital Nacional Guido Valadares (HNGV) Dili. To’o tuku 22.15, labele salva ona katuas nia vida,’’ dehan nia oan mane-boot ba Agência TATOLI iha Suku Ulmera, Postu Administrativu Bazartete, Munisípiu Liquiçá, segunda (1/7/2019), ho matan-ween.
Maun Abut nia mate nu’udar luta ida-nia ninin no vitória ida-nia rohan. Razaun, tanba, nia manán ona luta ida ho vitória “naran” ida ne’ebé hanaran-án “Samba-Sembilan”. Naran revolusionáriu ida ne’e, ema hotu-hotu no timoroan hotu-hotu hahí eh hanai hanesan naran lulik ida ne’ebé merese duni atu halulik iha Timor-Leste.
Ho naran lulik no santu ida ne’e, saudozu “Samba-Sembilan” halo ona rai nia naran. Saudozu halo ona Kay Rala Xanana Gusmão no Taur Matan Ruak nia naran morin, tanba nia sai lutu (eskoltu) ba Maun Abut na’in rua ne’e hodi bele halo estratéjia no lidera funu to’o manán independénsia. Nia, hamutuk ho Maun Abut na’in rua [Xanana & Ruak] sai tebes Timor nia abut hodi fó abut ba Timor-Leste nia abut moris buras no naran morin iha mundu rai klaran. Veteranu ne’ebé luta durante tinan 24 nia laran ne’e, ninia mate sai hanesan reflesaun ida ba ita katak mate husik hela “naran”, “luta” no “lia-tatoli”.
Naran
Naran ida “Samba-Sembilan” nu’udar naran ida ne’ebé halo inimgu sira admira no ta’uk tebes ba naran lulik ida ne’e. Naran ida “Samba-Sembilan” nu’udar naran ida ne’ebé halo timoroan sira laran nakdoko atu hatene sé loos mak naran ne’e nia na’in no sé loos mak fó naran ba ema ne’e? Naran ida “Samba-Sembilan” sai nu’udar ai-sasiik ida ne’ebé halo ema hotu kuriozu atu hatene, tanbasá mak Luta-Na’in Jaime Ribeiro nia naran mosu ho naran revolusionáriu ne’e sei hanesan ai-sasiik ida ne’ebé ema ida-idak koko atu siik tuir ida-idak nia interpretasaun.
Komandante no Veteranu, Lourenço “Aquito” José Cabral, haktuir saudozu Jaime Ribeiro nia luta iha prosesu funu ba libertasaun nasionál, habiban naran revolusionáriu ida “Samba-Sembilan” ne’ebé koñesidu tebes iha tempu funu nia laran. Naran “Samba-Sembilan” ne’e mosu tanba momentu ne’ebá sira halo embuskada ida ba inimigu sira, saudozu Jaime Ribeiro tiru kilat musan ida kona-dasa borus ema na’in sia (9) dala ida no mate dala ida de’it.
“Ami halo embuskada ida, kilat musan ida kona ema na’in-sia (9). Ne’e tebes. Ne’e realidade. Realidade tanba, primeiru, nia komandante pelotaun no ha’u mós komandante pelotaun,” haktuir Komandante Lourenço “Aquito” José Cabral, ne’ebé sira na’in rua “Samba-Sembilan” sai eskoltu ba Komandante Luta, Kay Rala Xanana Gusmão no Taur Matan Ruak durante tinan 24 iha ailaran ne’e ho sériu.
Hún seluk no dikin seluk, veteranu seluk interpreta naran “Samba-Sembilan” tuir veteranu ne’e ninia versaun. Sekretáriu Estadu Ba Asuntu Kombatente Libertasaun Nasionál, Gil da Costa “Oan Soru” Monteiro, rejeita katak nia la haree saudozu Jaime “Samba-Sembilan” Ribeiro tiru ema ho kartus musan ida tiru-borus ema na’in sia (9) mate dala ida.
“Lae! Istória la hanesan ne’e ida. Tiru ema iha ne’ebé mós ami hamutuk hela. Iha ne’ebá ne’e [ai-laran], la akontese to’ok hanesan ema ida-ida siik ne’e. Ema ida-idak gosta siik konforme ema ida-idak hakarak siik no bele siik de’it,” Oan Soru haktuir.
Polítikamente, tuir Oan Soru, iha tempu sira liu-ba kotuk ka iha tempu funu, sira mós gosta halo interpretasaun ba ema. Tanba ida ne’e nu’udar tátika funu nian ba nasaun nia laran para bele dada ema hotu-hotu nia hanoin atu bele manán funu. Ne’e hanesan polítika ida ne’ebé implementa iha tempu ne’ebá, tempu funu hasoru invazór rezime Soeharto.
“Tanba ami-nia maluk soldadu sira mesak Makasae oan mak barak entaun tau tan nia naran “ANU-SI’AK” ba saudozu. ANU iha lian-Makasae ne’e dehan EMA no SI’AK ne’e dehan SIAK. ANU-SI’AK ne’e dehan “EMA SIAK”. Ne’ebé, naran ida ne’e mós sai saudozu nia naran hotu,” Oan Soru esplika.
Wainhira nia hasoru malu ho saudozu iha tinan 1980, naran revolusionáriu “Samba” ne’e seidauk iha no ema nunka temi naran refere. Maibé, babain sira temi nia naran “Ribeiro” de’it. “Nia na’in rasik mós sempre temi nia naran ‘SAMBA’ ne’e múzika ida ema dansa ‘SAMBA’ [dansa Brazíl ninian]. Ne’e katak la’o hela de’it, entaun interpreta ba ne’ebá,” nia halolo no haloos.
Saudozu Samba-Sembilan rasik mós nahohuk ka lia-ida ho veteranu, Gil da Costa “Oan Soru” Monteiro. “Ha’u-nia naran kodigu ne’e SAMBA. Buat SEMBILAN ne’e hanesan SAMA VILA nian. Agora SAMBA ne’e buat múzika ida ‘Samba’ ne’e mak tau fali Sembilan. Ó dansa ‘Samba’ ne’e ó tenke ba vila. Ninia kontiúdu mak ne’e de’it. Ba tan ne’e, laiha,” dehan Samba-Sembilan hafoin simu Kondekorasaun Kolár Órden Timor-Leste hosi Prezidente Repúblika, Francisco “Lú Olo” Guterres, iha 28 novembru 2018.
Luta
Naran “Samba-Sembilan” idéntiku ho saudozu nia luta ba libertasaun nasionál. Luta ida ne’e, Komandante Aquito haktuir, fou-foun nia hasoru nalu ho saudozu Samba-Sembilan iha tinan 1984 iha Rejiaun III (Manatuto, Manufahi no Aileu). Hosi seidauk toman malu sai toman malu no sai hanesan maun-alin raan-nakait. Bainhira Samba-Sembilan lidera Rejiaun IV asumi kargu rua, Segundu Komandante Rejiaun iha 1989 no Kolaboradór Xefe Estadu Maiór iha 1998. To’o saudozu hakotu iis, saudozu hanesan Segundu Komandante Rejiaun IV.
Iha tinan 1997, Komandu transfere Samba-Sembilan ba rejiaun IV, sira na’in-rua tenke fahe malu. Fahe malu ida ne’e, akontese duni. Maski sira na’in rua halo kompromisu atu labele fahe malu iha tempu sá de’it maibé kna’ar foun tenke obriga sira tenke fahe malu tebes duni.
“Ha’u hameno ba nia; Kuidadu, kontrola soldadu hanesan baibain ita na’in-rua kuidadu. Labele dezkontroladu. Tanba hanoin barak ita bele dezkontroladu no ita bele hasoru problema, tanba ne’e funu laran. Nia rekomenda ba ha’u; Asegura xefe estadu maiór. Ida ne’e mak komandu funu, laiha tan seluk atu komanda funu,” haktuir Komandante Aquito ho tanis.
“Bainhira ami na’in-rua hamutuk, ami foti kilat rua iha Betano. Segundu, ami foti kilat tolu iha Alas. Terseiru, ami foti tan kilat tolu iha Kaikasa (Fatuberlihu). Tuir mai, ami foti tan kilat ida iha Sari (Fatuberlihu). Ami halo operasaun konjunta ida, foti kilat iha Barique ho Kribas nia klaran, hamutuk kilat 13. Ami foti kilat tolu iha Kaoris (Alas). Nia (Samba) la’o mesak foti tan kilat ida iha Lequidoe. Ha’u ba súl, foti kilat tolu,’’ nia lembra.
Hahú hosi tinan 1986 no 1987, Komandante Aquito ho Samba-Sembilan hahú sai eskoltu ba Komandante Luta, Kay Rala Xanana Gusmão ho Taur Matan Ruak. Hanesan buat ida, Maun Boot Xanana ho Ruak, ami na’in-rua ne’e permanente ba sira na’in-rua, atu asegura sira na’in-rua. Ami na’in-rua troka malu. Kuandu nia ba lidera forsa, ha’u mak asegura maun Xanana. Se ha’u mak lidera forsa, nia mak asegura Xanana.
“Ami na’in-rua salva maun Xanana iha rai Sarlolo iha Ainaro. Ami na’in-rua mak troka malu salva maun Xanana. Ami-nia karáter iha prosesu funu, ohin ida, aban ida, bainrua ida. Karáter iha funu la permanente,” Komandante Lourenço “Aquito” José Cabral hateten. Bainhira Xanana ema kaptura, ami na’in-rua ko’alia nune’e; Xanana kaptura, kerdizer Xanana 10 sei mosu fali. Tanba ami hatene.”
Mensajen
Hosi saudozu Samba-Sembilan nia mate, fó hela reflesaun ida be kle’an ida ba timoroan sira, katak mate nu’udar mensajen ida ne’ebé ita tatoli lia rekadu ba malu no sai hanesan mensajen ida atu fó hanoin ba ema seluk atu tulun malu, liliu família no oan-ki’ak sira be saudozu husik hela iha mundu ne’e.
Haree ba kondisaun feto-faluk no oan-ki’ak sira be moris mesak no moris terus, Komandante Lourenço “Aquito” José Cabral, ho fuan ho laran tomak hateten ba saudozu Samba-Sembilan nia iis-rohan (espoza). “Bainhira ha’u sei moris, Samba-Sembilan nia oan hanesan ha’u-nia oan. Ha’u sei ko’alia ho estadu. Bainhira Samba-Sembilan atu tau ba kaixaun, família sira tenke husu ha’u. Tanba, ami na’in-rua nia kompromisu iha ai-laran todan tebes. Bainhira ha’u sei moris, ha’u sei haree nia oan na’in-ualu ne’e,” dehan veteranu Aquito.
Entretantu, Asistente Polítika Rejiaun III, Pasqual “Nicson” Ximenes Pereira hateten, hosi parte loromonu nian, Samba-Sembilan mós la’ós ema ida kualkér iha prosesu luta ba libertasaun nasionál. Tanba ne’e, “Ha’u husu estadu ida ne’e tenke valoriza didi’ak veteranu sira, liliu hanesan veteranu Samba-Sembilan. Tanba maioria labarik sira ne’e sei ki’ik hotu. Estadu labele hanoin prosesu ida atu hakoi ne’e mak rebo-rebo hafoin mai vizita de’it. Se bele, ajuda ba nia família tenke kontinua. Tanba Samba-Sembilan hanesan veteranu ida ne’ebé dedika-án ba luta naruk ida ne’e to’o ramata,’’ dehan nia.
Nune’e mós, veteranu maluk, José dos Santos “Komandante Labarik” Lemos, sente triste bainhira rona informasaun katak Samba-Sembilan mate tiha ona. “Ami triste, maibé aman Maromak bolu ona nia. Uluk funu la mate maibé destiñu ita labele espera. Ha’u husu estadu atu tau-matan didi’ak ba veteranu sira. Tanba, ita hotu hatene kondisaun veteranu sira nian oras ne’e laduun di’ak. Ami la ezije maibé se sente dehan ami mós fó kontribuisaun ba rai ida ne’e, bele tau-matan ba oan-ki’ak sira,” dehan Komandante Labarik.
Loos duni, katak saudozu Samba-Sembilan nia mate halo ema wa’in hato’o sira-nia sentimentu laran susar nian ba família enlutada. Saudozu Samba-Sembilan nia iis-rohan (espoza), Manuela Pereira Ribeiro, mós sente tristi no laran susar tebes. “Ha’u tristi no hanoin barak tebes tanba oan barak. Durante ne’e katuas mak fó han maibé nia laiha ona. Ha’u atu lori saida mak fó han sira. Labarik sira ne’e sei ki’ik hotu. Ha’u tuur no hanoin barak loos,” nia haklaken.
“Ba ha’u, atu husu, ha’u la husu. Se estadu hanoin nia [Samba-Sembilan] terus ba rai ida ne’e, entaun tau-matan ba oan na’in hira ne’e. Família mós sei la taka matan ba ami,” Manuela Pereira hato’o lia-tatoli ne’e ho laran susar.
Maski luta-na’in Kay Rala Xanana Gusmão seidauk prezensa iha matebian nia uma maibé liuhusi nia oan-mane, Kay Olok Sword Gusmão, ne’ebé akompaña hosi Korpu Seguransa pesoál (CSP-sigla Portugés), Xanana hato’o sentidu kondolénsia ba saudozu Samba-Sembilan liuhusi eskrita ho liafiuan badak “Adeus Samba! Ami sei hamutuk ho ó-nia família”.
Atu estadu no veteranu eh Xanana hamutuk nafatin atu hamatan ba saudozu Samba-Sembilan nia oan sira, hirak ne’e sai hanesan mensajen prinsipál ida ne’ebé aban bainrua bele implementa ka lae, dalaruma ida ne’e sei haree ba governu nia prioridade sira ne’ebé prinsipál. Maibé buat ida ne’ebé sai prinsipál tebes maka saudozu Samba-Sembilan nunka hanorin nia oan sira atu tane-liman ba ema seluk no husu izmola ba estadu.
Saudozu Samba-Sembilan sempre kuda espíritu fiar-án no prinsípiu moris ida-nian ba nia oan-sira atu sai ema ne’ebé iha prinsípiu moris ho liafuan simples; “Aban bainrua sai mane-klosan, labele ezije ba estadu maibé buka dalan kontribui ba estadu”. Adeus “Eroi Boot Samba-Sembilan! Adeus “Anu-Si’ak” Samba-Sembilan! Adeus “Maun Abut” Samba-Sembilan! Ita-boot nia istória nia abut mak sai sasin-matan ida katak ita-boot mak Timor-Leste nia abut. Adeus, Adeus, Adeus eroi boot Samba-Sembilan!
Jornalista: Cancio Ximenes
Editór: Xisto Freitas
