Primeiru-Ministru, Taur Matan Ruak, Sorumutuk Hamutuk Organizasaun Internasional Nivel Rejional no Multilateral Sira ne’ebé Sai Hanesan Parseiru Dezenvolvimentu Timor-Leste (Timor-Leste Development Partners Meeting-TLDPM),Tinan 2019 ho Tema “Hametin Liután Koordensaun Kona-ba Finansiamentu ba Dezenvolvimentu” Iha Salaun Auditoriu Ministériu Finansas,Aitarak Laran,Dili,Kinta (04/07/2019). Imajen/Egas Cristovão

DILI, 06 jullu 2019 (TATOLI) – Finansiamentu husi parte Parseiru Dezenvolvimentu nu’udar fonte indikadu no agregadu husi Orsamentu Jerál Estadu (OJE), bazeia ba Lei Parlamentár nú. 13/2009, 15 outubru, kona-ba Lei Orsamentu no Jestaun Finanseira, tanba ne’e asisténsia externa hanesan konseitu importante ba Governu Timor-Leste.

Bazeia ba Livru 5-Parseiru Dezenvolvimentu husi OJE 2019, maske fonte asisténsia externa iha redusaun tanba kresimentu OJE kada tinan, maibé konstantamente kada tinan fonte husi doadór sira ne’e kontribui ona millaun $150 resin iha tinan 12 ikus ne’e, no iha tinan 2019 previstu ajudu husi fonte 24 ho montante millaun $222,6, kompostu husi millaun $162,6 hanesan forma donativu la-inkluidu iha orsamentu no millaun $60 hanesan forma empréstimu iha kondisaun favorável.

Asisténsia externa tinan ne’e, mai husi fontes bilaterál 10 no fontes multilaterál 14, no grupu parseiru dezenvolvimentu lima ne’ebé fó asisténsia ho montante aas liu mak Governu Austrália ho millaun $50,3 (reprezenta  31% husi totál), Uniaun Europeia (UE) millaun $22,7 (14%), Portugal inklui finansiamentu Instituto Camões millaun $16,5 (10%), Japaun inklui Governu Japaun no JICA millaun $15,4 (10%), Estadu Unidu Amérika (EUA) millaun $13,3 (8%).

Asisténsia externa sa’e liu montante millaun $200 entre tinan 2011 no 2015, maske nune’e dezde 2015 rejistadu iha tendénsia tuun no iha 2017 iha nível tuun liu kompara ho tinan seluk ho totál millaun $176,6, enkuantu orsamentu husi Fonte Kombinada ne’e tuun 23,5% iha tinan 2010 ba 10% iha tinan 2019, iha baze planeada.

Planu Dezenvolvimentu (PED) 2011-2030 hanesan kuadru globál ba programa no projetu ne’ebé tenke aliña. Entre pilár haat, Kapitál Sosiál mak hetan ajuda barak liu ho montante millaun $79,9 ka reprezenta 49,1% husi dezembolsu totál ne’ebé planeia ona iha tinan 2019.

Pilár seluk mak Dezenvolvimentu Ekonómiku, sei hetan asisténsia externa hamutuk millaun $31,74 (reprezenta 19,5% husi totál), Dezenvolvimentu Infraestrutura millaun $22,80 (17,1%) no pilár ikus liu mak Kuadru Institusionál millaun $22,29 (13,7%).

Parseiru Dezenvolvimentu sira sei kontinua apoia sub-pilár Saúde no Edukasaun hamutuk reprezenta 39% resin husi totál dezembolsu planeadu durante tinan ne’e, enkuantu apoiu aas ida tan mak sub-pilár PED Agrikultura. Entretantu sub-pilár Saúde, Edukasaun ho Agrikultura hanesan área ne’ebé aliña ona iha faze dahuluk PED/roteiru Objetivu Dezenvolvimentu Sustentável.

Dadus ne’ebé rekolla husi asisténsia Parseiru Dezenvolvimentu ba apoiu direta ba instituisaun govermentál reprezenta 93% husi asisténsia parseiru dezenvolvkmentu iha tinan 2019.

36,2% husi asisténsia ne’e sei utiliza ba finansiamentu atividade asisténsia téknika, 44,1% sei utiliza iha donativu, restu 12,7% husi fundu la-identifikadu husi parseiru dezenvolvimentu.

VIII Governu Konstitusionál, foin lais ne’e, halo ona enkontru bilaterál no enkontru koordenasaun ho parseiru dezenvolvimentu sira (TLDPM-sigla inglés) no iha biban hanesan lansa dokumentu Polítika Asisténsia Externa ka “Foreign Aid Policy”, hodi aliña atividade hotu husi parseiru dezenvolvimentu sira ho prioridade Governu, defini matadalan foun kona-ba aprovasaun hodi mellora koordenasaun atividade sira hotu no integra portefóliu projetu sira ne’ebé finansia hosi doadór iha planu nasionál ho sistema orsamentu nian.

Iha Fórum dahaat Altu Nível iha Busan, Koreia Sul ne’ebé realiza iha novembru 2011, aprezenta ona akordu foun kona-ba Efikásia Ajuda no endossadu husi nasaun 44 resin no organizasaun seluk inklui Timor-Leste.

Iha akordu foun ne’e orienta dezenvolvimentu iha Estadu Fragil sira liuhosi promosaun dalan ba dame, resiliénsia ne’ebé kria no lidera husi nasaun sira ne’e rasik.

Jornalista: Julia Chatarina

Editór.       : Rafy Belo

HAKEREK NO HATÁN

Please enter your comment!
Please enter your name here