Vendadór ambulante sira komesa ba hamoos eis Kuartél Jenerál, Caicoli, Dili hodi muda sira nia sasan ba falan fali iha area refere. Imajen/Nelia Fernandes

DILI, 05 jullu 2019 (TATOLI)-Vendedór ambulante sira ne’ebé durante ne’e okupa area estada ninin, tasi ibun, Sional nian to’o area Largo Lecidere, hodi fa’an motor, fa’an karreta,  fa’an nu’u laloir no fa’an sasán iha gerobak laran, komesa muda sai ona hodi kumpre orden husi Autoridade Munisípiu Dili nian.

Porta voz negosiante fa’an motor ho karreta iha area Sional nian, Jenito Jordão Soares.

Vendedór sira kolabora di’ak tebes hodi lori sira ida-idak nia sasán atu ba fali  iha fatin ne’ebé Autoridade Munisípiu Dili termina tiha ona mak iha eis Kuartél Jenerál FALINTIL-Forsa Defeza Timor-Leste (F-FDTL), Caicoli, Dili.

Autoridade Munisípiu Dili husu kolaborasaun husi vendedór ambulante sira atu kumpre orden hodi hamamuk estrada ninin husi  atividade negósiu hodi prepara simu bainaka internasionál sira ne’ebé mak atu partisipa selebrasaun festa konsulta popular, 30 Augusto, tinan ne’e.

 “Ami ko’alia ona ho Autoridade Munisípiu Dili no ami mós koopera ho Estadu atu muda sai husi fatin ne’ebé ami halo negósiu ba. Infelizmente, Autoridade Munisípiu Dili hatudu ona fatin mai ami mak iha Caicoli,” hateten porta voz negosiante fa’an motor ho karreta iha area Sional nian, Jenito Jordão Soares, ohin.

Oras ne’e negosiante sira ida-idak komesa hamoos ona sira nia fatin atu kontinua sira nia atividade negósiu fa’an motor ho karreta iha fatin provizóriu eis Kuartél Jerál F-FDTL nian.

Jornalista         : Nelia Fernandes

Editór                : Francisco Simões

1 KOMENTÁRIU

HAKEREK NO HATÁN

Please enter your comment!
Please enter your name here