Komandante Komandu Operasionál Nasionál (KKON), Superintendente Xefe, Pedro Belo.Imajen/Eugénio Pereira.

DILI, 05 jullu 2019 (TATOLI)- Komandu Polisia Nasionál Timor-Leste (PNTL) sei la tolera nia membru sira envolve iha grupu organizasaun arte marsiál.

Komandante Komandu Operasionál Nasionál (KKON) PNTL, Superintendente Xefe, Pedro Belo reafirma katak, bainhira identifika membru polisia balun envolve  grupu organizasaun arte marsiál sei hasai husi serbisu.

Nia dehan, membru PNTL hotu- hotu ne’ebé sai polisia halo ona juramentu ba ria lulik ne’e tuir Konstituisaun RDTL artigu 147 ne’ebé ko’alia kona-ba polisia ho forsa seguransa.  Polisia tenke defende legalidade demokrátika no garante seguransa interna ba sidadaun hotu no la inkilina ba partidu polítiku.

Polisia mós, tuir Pedro Belo, halo serbisu prevensaun krime tenke respeitu ba direitus umanus tuir lei mak vigora iha país ida ne’e.

“Se povu sira hatene pesoál polisia balun maka iha kotuk apoiu organizasaun arte marsiál hodi  halo problema, hato’o keixa mai Komandu PNTL, tanba Komandu PNTL sei la tolera nia membru envolve iha kazu arte marsiál,” informa Komandante Pedro Belo, ohin, ba jornalista iha Kuartél Jerál PNTL, Caicoli, Dili.

Pedro Belo alerta ba povu, inklui joven sira bainhira haree membru polisia balun maka envolve direita iha problema organizasaun arteriál tenke hato’o keixa ba Komandu atu bele foti medida tuir lei dixiplinár polisia nian.

Jornalista         : Eugénio Pereira

Editór                : Francisco Simões

HAKEREK NO HATÁN

Please enter your comment!
Please enter your name here