Komandante Komandu Operasionál Nasionál (KKON), Superintendente Xefe, Pedro Belo.Imajen/Eugénio Pereira

DILI, 05 jullu 2019 (TATOLI)- Komandu Polisia Nasionál Timor-Leste (PNTL), ohin, hasai ona orden serbisu ba Komandu PNTL Munisípiu 12, inklui Rejiaun Administrativu Espesiál Oe-Cusse Ambeno  (RAEOA) atu halo operasaun makas liután hodi evita konfrontu entre grupu kriminozu sira.

Komandu PNTL hola medida ne’e atu evita mós konfrontu ne’ebé akontese entre grupu juventude sira iha Aldeia Baura, Suku Leorema, Postu Administrativu Bazartete, Munisípiu Liquiça, atu labele hada’et to’o fali ba munisípiu seluk.

“Ohin kedas iha orientasaun husi komandante jerál liuhusi komandu operasaun hodi hatún ba komandu polisia munisípiu hotu- hotu atu halo vijilánsia kontrolu makas situasaun seguransa iha munisípiu laran,”  hateten  Komandante Komandu Operasionál Nasionál (KKON), Superintendente Xefe, Pedro Belo, ohin, ba jornalista iha Komandu Jerál PNTL, Caicoli, Dili.

Komandu Jerál mós husu ba polisia unidade hotu- hotu atu hola parte hametin liután lutu seguransa hodi evita konfrontasaun entre grupu juventude sira akontese beibeik.

“Ita tenke antesipa halo patrullamentu no auto stop para prevene kazu ne’e labele hada’et ba munisípiu seluk,” afirma Pedro Belo.

Komandu PNTL liu husi Ofisial Polisia Suku (OPS) sei koordena ho veteranu, padre iha Igreja sira no autoridade suku, lider konsellu suku no grupu juventude hodi akalma no hametin seguransa iha idak-idak nia bairru.

Pedro Belo husu ba populasaun, liu-liu joven sira la’o iha tempu kalan labele lori sasán kro’at hanesan tudik, rama ambon, tanba bainhira polisia halo patrullamentu maka hetan sei kaer.

Nia dehan, agora daudaun númeru seguransa PNTL menus, tanba ne’e koopera ho autoridade sira atu aviza ba povu hodi halo seguransa hamutuk.

 “Ita ema maka tenke iha konsiénsia atu evita aan husi krime, no prevensaun ba krime ne’e la’ós serbisu polisia nian de’it, maibé presiza ema hotu nia kolaborasaun,” tenik  Pedro Belo.

Jornalista         : Eugénio Pereira

Editór               : Francisco Simões

HAKEREK NO HATÁN

Please enter your comment!
Please enter your name here