Kay Olo Sword Gusmão

DILI, 5 jullu 2019 (TATOLI)—Kay Olo Sword Gusmão hanesan oan mane daruak hosi Eis Primeiru-Ministru RDTL, Kay Rala Xanana Gusmão, dadaun ne’e hala’o hela treinamentu hamutuk ho nia amigu sira hodi reforsa Selesaun Nasionál U-18 ne’ebé sei partisipa iha eventu internasionál ASEAN Football Federation (AFF) ne’ebé sei hala’o iha Vietname, agustu mai ne’e.

Antes ne’e, Kay Olo reprezenta ona Timor-Leste hamutuk ho nia amigu sira reforsa Selesaun Nasionál U-15. Tanba ne’e, jogadór refere iha esperiénsia natoon hodi kompete iha AFF tinan ida ne’e. Aleinde ne’e, iha Timor-Leste, Kay Olo joga iha klube AD SLB Laulara hanesan avansadu.

Ba jornalista, Kay Olo hateten, hanesan raan Timor nian sente kontente tanba iha tempu badak sei hamutuk ho nia amigu sira reforsa Selesaun Nasionál U-18 iha jogu AFF.

“Ha’u kontente tebes reprezenta ha’u-nia nasaun ba iha jogu internasionál. Ha’u sei hatudu prestasaun di’ak nune’e bele lori ekipa Timor-Leste la sai kampiaun maibé bele to’o iha semi finál,” tenik Kay Olo iha Kampu Federasaun Futeból Timor-Leste (FFTL), Bairru Formosa, ohin.

Iha fatin hanesan, treinadór Selesaun Nasionál U-18, Andi Susanto informa katak dadaun ne’e jogadór hotu preparadu ona atu ba tuir kompetisaun nível internasionál ne’e.

“Jogadór sira preparadu hotu ona. Totál jogadór 30 mak ha’u hili. Tuir kritéria AFC nian tenke jogadór 30. Loloos, ha’u atu lori 21 de’it maibé ita lahatene to’o iha ne’ebá keta mosu fallansu hanesan kondisaun jogadór balun nian ladi’ak karik ita bele troka lalais,”  tenik Andi.

Tuir oráriu ne’ebé fó sai ona, Timor-Leste monu iha gru A hamutuk ho Indonezia, Myanmar, Laos, Folipina, Brunei Darusalam. Timor-Leste nia jogu dahuluk sei kontra Brunei iha 5 agostu, hasoru Indonézia iha 7 agustu, Myanmar iha 9 agostu, hasoru Filipina 11 iha agostu no hasoru Laos iha 13 agostu.

Jornalista: Hortençio Sanchez

Editór: Xisto Freitas

HAKEREK NO HATÁN

Please enter your comment!
Please enter your name here