DILI, 5 jullu 2019 (TATOLI)—Prezidente Parlamentu Nasionál, Arão Noé de Jesus da Costa Amaral hateten tinan 2026 kadoras hosi kampu Greater Sunrise sei dada mai Beaço, Viqueque, tanba ne’e presizamente juventude timoroan sira tenke iha kualifikasaun para bele sai autór ba dezenvolvimentu iha nasaun ne’e.
“Ha’u triste kuandu haree juventude aban bainrua la hetan oportunidade tanba laiha kualidade. Tanba ne’e, juventude tenke prepara-án atu bele sai autór ba dezenvolvimentu ba mina ne’ebé sei mai,” Arão ba jornalista iha Parlamentu Nasionál, ohin.
Ema dahuluk ne’ebé lidera órgaun daruak ne’e preokupa tanba oras ne’e dadaun joven sira kontinua baku malu, hafuhu malu no hana malu tanba interese grupu nian.
Tuir nia, laiha benefísiu hosi aktu sira ne’e tanba rezultadu ikus tenke hasoru justisa ba buat aat ne’ebé halo ona.
“Husu ba foinsa’e timoroan sira prepara-án hahú agora atu sai joven ida iha kapasidade, buka kapasita-án nune’e bele aproveita dezenvolvimentu iha 2026 ne’e,” nia sujere.
Nia apela ba FALINTIL-Forsa Defeza Timor-Leste (F-FDTL) no Polísia Nasionál Timor-Leste (PNTL) kontinua hasa’e vizibilidade rai laran para bele ajuda lori fali establidade ba nasaun ne’e liliu iha kapitál munisípiu sira.
Jornalista: Tomé Amado
Editór: Xisto Freitas
