Vise Prezidente Parlamentu Nasionál, Maria Angelina Sarmento. Foto Egas Cristóvão

DILI, 4 jullu 2019 (TATOLI)—Vise Prezidente Parlamentu Nasionál, Maria Angelina Sarmento hateten jestu ne’ebé mak komunidade Suku Ulmera hatudu hodi hasa’e bandeira meia haste (setengah tiang) ba saudozu Samba-Sembilan nia mate konsideradu nu’udar asaun ida fó hanoin ba Parlamentu Nasionál atu konvoka planu ruma hodi halo diskusaun ba asuntu ne’e.

“Ami haree inisiativa komunidade Ulmera, Postu Bazartete, Munisípiu Liquiçá nian ne’e di’ak teb-tebes no presiza apresia no louva. Jestu ne’e hanesan tristeza ba eroi nasionál ida ninia mate, tanba aswa’in ne’e ninia kontribuisan ba rai ida ne’e totálmente laiha rezerva,” tenik nia ba Agência Tatoli iha Parlamentu Nasionál, ohin.

Maria Angelina informa katak nia rasik sei reforsa kestaun ne’e para PN bele iha biban atu diskute asuntu ne’e nune’e bele hatudu sentidu kle’an ka profunda ba líder nasionál no istóriku sira.

Nia hatutan agora Parlamentu Nasionál (PN) mós hatudu ona aktu solidariedade hodi fó ona ninia votu pezár ba eroi Samba-Sembilan ninia mate para bele sai dokumentu importante ida nasaun nian, maibé presiza atu haree ba oin mak ninia oan sira ne’ebé la hetan oportunidade ba eskola.

Tuir deputada ne’e katak estadu iha obrigasaun morál atu trata ho dignu eroi saudozu Samba-Sembilan ninia oan sira-nia vida para bele asesu ba prosesu dezenvolvimentu nasaun ida ne’e nian.

“Ita-nia pátria libertadu ona hosi kolonializmu nia ukun. Estadu debe hela ninia kontribuisaun durante tinan 24 luta iha ailaran. Tan ne’e, estadu tenki selu tusan sira ne’e hodi kria fali kondisaun di’ak ba ninia familia sira,” Maria Angelina subliña.

Jornalista: Tomé Amado

Editór: Xisto Freitas

 

HAKEREK NO HATÁN

Please enter your comment!
Please enter your name here