Eis-prezidente Taur Matan Ruak (TMR). Foto: Media eis-prezidente

ERMERA, 05 jullu 2019 (TATOLI)-Primeriu Ministru (PM) Taur Matan Ruak promete katak iha planu prioridade tinan 2020 sei tau orsamentu hodi harii tan sala de aula 1000 iha eskola hotu iha territóriu laran.

“Eskola barak mak kondisaun ladi’ak entaun ita hakarak atu halo eskola sira ne’e. Ha’u husu ba ministra edukasaun ita presiza sala de aula hira tan mak atu halo? Ministra dehan presiza tan 1228, agora besik eskola 5000 iha territóriu laran tomak daudaun eziste. Maibé, ha’u dehan ba ministra edukasaun bele aumenta 5000 no ita halo aumenta sala aula hamutuk 1000 halo dala ida de’it,” garante PM Taur bainhira diálogu ho komunidade Ermera hodi fahe informasaun kona-ba programa planu prioridade governu nian ba tinan 2020-2023.

Tuir xefe governu, ida ne’e orienta ba projetu komunitáriu katak inan aman no populasaun iha suku sira ajuda para hodi halo.

“Husi sala de aula ita hakarak halo tan 1000 ne’e. 5000 ba oan sira eskola no 5000 ba sala profesór sira, biblioteka, laboratóriu, aumenta sala kantina eskolár no uma ba profesór nune’e ita bele rezolve problema iha eskola. Nune’e, ita-nia oan sira bele eskola di’ak,” garante lider ezekutivu ne’e.

Primeiru-ministru Oitavu Governu mós kompromete tinan-tinan tenke halo esforsu ba eskola ne’ebé bee no eletrisidade laiha tenke dada. “Ho ida ne’e ita tenke iha estatístika no planu di’ak para nune’e investe osan”.

“Alende ne’e mós prioridade kontinua mak formasaun ba profesór sira no seluk tan mak investimentu ne’ebé ita halo nune’e bele forma ita-nia oan sira sai matenek aban bainrua lori rai ne’e ba oin,” konsidera Primeiru-ministru Taur Matan Ruak.

Jornalista : Nelson de Sousa

Editór       : Rafy Belo

HAKEREK NO HATÁN

Please enter your comment!
Please enter your name here