DILI, 05 jullu 2019 (TATOLI)-Fundu ba Dezenvolvimentu Kapitál Umanu (FDCH-sigla portugés), ohin, hala’o enkontru ho Komandu Polisia Nasionál Timor-Leste (PNTL) hodi aprezenta kona-ba programa bolsu estudu ba PNTL.
Aprezentasaun programa FDCH ne’ebé hala’o iha Kuartél Jerál PNTL, Caicoli, Dili, husi Sekretária Ezekutiva FDCH interina, Leila Cárceres dos Santos, ba ekipa Komandu PNTL ne’ebé lidera husi Komandante Jerál PPNTL, Komisáriu Faustino da Costa.
FDCH mós fahe informasaun kona-ba prosedimentu no lala’ok sira oinsá atu responde ba programa adisionál sira no koordena mós ezekusaun planu programa PNTL nian iha parte Dezenvolvimentu Rekursus Umanus iha área formasaun no bolsa-estudu tinan 2019 no planu programa ba dezenvolvimentu rekursus umanus PNTL nian iha tinan 2020.
Enkontru ne’e nu’udar mós enkontru dahuluk ne’ebé FDCH halo ho Komandante PNTL Komisáriu, Faustino da Costa ho ninia estrutura foun.
PNTL nu’udar instituisaun Estadu ne’ebé akreditadu iha FDCH nune’e iha tinan 2019 ho orsamentu hamutuk $300.000.00 ne’ebé sei finansia ba programa hamutuk 15.
Jornalista : Eugénio Pereira
Editór : Francisco Simões