Treinadór Boavista FC Timor, Fabiano José Flora

DILI, 5 Jullu 2019 (TATOLI)—Treinadór Boavista FC Timor,  Fabiano José Flora agradese no orgullu ba Federasaun Futeból Timor-Leste (FFTL) ne’ebé fó ona konfiansa ba nia hodi kaer Selesaun Nasionál U-23 hodi troka treinadór anteriór hosi Japaun, Norio Tsuketate ne’ebé iha nia lideransa la lori rezultadu di’ak ba Timor-Leste iha jogu internasionál sira.

“Ha’u agradese ba FFTL no ba mós prezidente Boavista ne’ebé lori ona ha’u mai kaer Selesaun Nasionál. Ne’e difísil. La’ós fásil. Ita tenke serbisu maka’as. Labele krítika malu de’it, tenke serbisu hamutuk, kria ekipa ne’ebé unidu nune’e ita bele hetan rezultadu di’ak,” Fabiano afirma ba jornalista iha Loja Pateo, Dili, ohin.

Eis treinadór Selesaun Nasionál Myanmar ne’e dehan, maioria jogadór Timor barak iha kualidade maibé tenke treinu maka’as ho disiplina nune’e bele hetan rezultadu di’ak.

Tanba FFTL fó ona konfiansa, nia promete sei serbisu maka’as nune’e hodi buka jogadór hamutuk 30 no guarda rede rua hodi prepara ba jogu Sea Games ne’ebé sei hala’o iha Manila-Filipina, setembru mai ne’e.

 Treinadór nasionalidade portugés ne’e hatutan, kaer Selesaun Nasionál hanesan kaer nasaun nia dignidade. Tanba ne’e, nia sei esforsu maka’as hodi hatudu netik rezultadu di’ak ruma ba Timor- Leste.

Atuál treinadór Boavista ne’e sei asina kontratu ho FFTL segunda semana oin.  “Segunda, ha’u asina kontratu mak foin atu haree ba oin oinsá hodi prepara ekipa,” tenik Fabiano.

Konfiansa ne’ebé ezekutivu haraik ba Fabiano tanba iha esperiénsia ne’ebé másimu no iha sertifikadu profisionál UEFA grau ‘A’ ne’ebé mak hala’o ona nia kareira hanesan treinadór hafoin hetan esperiénsia hosi ekipa koñesidu iha Europa hanesan Académica, Lazio, Juventus, PSG, MU, Benfica no sai mós treinadór prinsipál iha klube Primeira Divizaun Myanmar no mós Selesaun Nasionál Myanmar nian.

Jornalista: Hortençio Sanchez

Editór: Xisto Freitas

HAKEREK NO HATÁN

Please enter your comment!
Please enter your name here