Prezidente Parlamentu Nasionál, Arão Noe de Jesus da Costa Amaral. Imajen Tatoli/Egas Cristóvão

DILI, 5 jullu 2019 (TATOLI)—Prezidente Parlamentu Nasionál, Arão Noé de Jesus Amaral hateten desizaun atu halo alterasaun lei númeru 3/2014 kona-ba Rejiaun Administrativa Espesiál Oé-Cuse Ambeno (RAEOA) nian hetan ona konkordánsia hosi líder bankada sira.

“Ami desidi hamutuk desizaun ne’e tanba lei refere Parlamentu Nasionál (PN) tau tiha ona iha konsiderasaun depois simu relatóriu pareser hosi Komisaun A trata Asuntu Konstitusionál no Justisa iha kinta liu-ba,” tenik nia iha Parlamentu Nasionál, ohin.

Nia dehan, atlerasaun lei ne’e bazeia ba atividade RAEOA no Zona Espesiál Ekonomia Merkadu Sosiál (ZEESM) nian inklui mandatu Prezidente Autoridade RAOEA, Marí Alkatiri nian ne’ebé sei ramata iha fulan ida ne’e.

Signifika, Arão esplika, molok Prezidente Autoridade RAEOA ne’e ramata ninia madatu iha Oé-Cuse, PN hala’o tiha ona ninia misaun hodi altera tiha ona lei refere.

Iha sorin seluk, Vise Prezidente Komisaun A, Francisco de Vasconcelos antes ne’e esplika ona katak alterasaun lei númeru 3/2014 ne’e presiza halo duni tanba durante ne’e la’o la tuir ninia dalan.

Deputadu bankada Partidu Libertasaun Populár (PLP) ne’e haklaken funsionamentu RAEOA nian inklui kna’ar Prezidente Autoridade nian loloos ne’e reponsalblidade governu sentrál nian, la’ós iha Prezidente Repúblika ninia kompeténsia atu fó pose.

“Kompeténsia Xefe Estadu nian atu fó pose ne’e mak Prezidente Tribunál Rekursu, Prokuradór Jerál Repúblika, Primeiru-Ministru, Xefe Estadu Forsa Defeza no Komisáriu PNTL. Agora presiza hadi’a para bele la’o tuir ninia dalan. Portantu, ajenda importante ne’e sei debate iha segunda (8/07/2019),” nia esplika.

Jornalista: Tomé Amado

Editór: Xisto Freitas

HAKEREK NO HATÁN

Please enter your comment!
Please enter your name here