Logotipu ALFeLa

DILI, 05 jullu 2019 (TATOLI)-Papel Asisténsia Legal ba Labarik (ALFeLa) nian mak atu fó asisténsia ba vitima violasaun ba labarik sira no mós violasaun hasoru inan feton sira.

Diretor Ezekutivu ALFeLa, António Marques, ohin, ba Ajénsia TATOLI hateten, papel ALFELA nian ba feto no labarik sira mak atu fó asisténsia legal ba sira ne’ebé mak sai vítima, liuliu ba kazu hanesan violasaun doméstika, violasaun seksuál, abuzu seksuál no kazu sira jerálmente bazeia ba jéneru.

“Inísiu kazu ruma mak akontese ba feto no labarik sira, ami akompaña kedas husi akontesimentu iha fatin no lori sira ba iha polisia depois ba iha Ministériu Públiku (MP) to’o iha Tribunal,” tenik Diretora Ezekutivu ALFeLa, António Marques, iha nia knaar fatin, Vila Verde, Dili.

ALFeLa  iha programa balun ne’ebé mak atu hasae feto no labarik sira-nia koñesimentu oinsá luta ka halo advokasia ba sira nia direitu fundamentu.

“Ami  fahe informasaun ba estudante sira, komunidade no mós ba lider komunitária  sira no hasae sira-nia koñesimentu kona ba oinsá atu prosesu kazu ba justisa formal,” informa António Marques.

Kazu ne’ebé mak rejistu iha ALFeLa ho nia númeru aas mak violasaun doméstika ne’ebé akontese sirkunstánsia iha uma laran, hanesan feen ho la’en, aman ho oan, inan ho oan ne’ebé hela hamutuk, tuir mak violasaun seksuál, abuzu seksuál, violasaun bazeia ba jéneru no seluk tan.

Daudaun ne’e, ALFeLa kontinua serbisu no halo monitorizasaun ba Munisípiu 12, inklui Rejiaun Administrativu Espesiál Oe-Cusse Ambeno (RAEOA) no fahe mós informasaun ba komunidade sira ne’ebé seidauk hatene serbisu ALFeLa nian.

Jornalista   : Osória A. Marques

Editór         : Francisco Simões

HAKEREK NO HATÁN

Please enter your comment!
Please enter your name here