Jogadór Atlético Ultramar festeja sira-nia vitória. Imajen Mídia LFA

DILI, 3 Jullu 2019 (TATOLI)—Klube Atlético Ultramar konsege hakat ba jogu semi finál hafoin halakon armada Porto Taibessi ho rezultadu 2-0, iha jogu kontinuasaun Tasa 12 de Novembro ne’ebé hala’o iha Estádiu Munisipál Dili, ohin loraik.

Porto Taibessi obrigadu tenke sai hosi jogu Tasa 12 de Novembro tanba jogu ne’e uza sitema bota fora (sistem gugur-termu Indonézia).

Golu vitória Ultramar prodúz hosi jogadór João Xavier (19) iha minutu 12 no Fabio Christian iha minutu 90+2.

Hosi vitória ne’ebé Ultramar gaña lori kedas ekipa refere hakat ba faze semi finál hamutuk ho ekipa rua hanesan Lalenok no Karketu ne’ebé sei joga hasoru malu iha semana oin.

Jogu refere dirije hosi árbitru Jaime Gonçalves, juiz liña Filomeno Silva, Eufrásio da Costa no árbitru rezerva Cristóvão Alves.

Maski lakon, treinadór Porto Taibessi, José Pereira konfesa katak sira la konsege manán tanba fallansu iha liña avansadu. “Ohin ne’e loloos ami manán. Ami domina bola maibé avansadu mak ladi’ak. Sira-nia jogadór ida hetan ona kartaun mean maibé ami labele nafatin atu marka golu ruma,” tenik José Pereira.

Iha sorin seluk, treinadór Atlético Ultramar, Gaspar Pinto sente kontente tanba ninia jogadór joga ho kalma no halo tuir orientasaun ne’ebé nia fó to’o ikus hatudu duni rezultadu.

“Ha’u sente haksolok ho rezultadu ohin ne’e. Ami bele hakat ba semi finál maibé ida ne’e todan tebes. Ha’u ho jogadór sira tenke treinu maka’as liu-tan,” tenik Gaspar.

Aleinde ne’e, nia kritika mós árbitru ne’ebé foti dezisaun la justu ba nia jogadór. “Ha’u la simu árbitru nia desizaun ne’ebé foti la loos. Ema-nia jogadór mak tebe ha’u-nia jogadór, ha’u-nia jogadór ko’alia nia (árbitru) fó kedas kartaun mean ne’e hanoin ladi’ak,” nia lamenta.

Tanba ne’e, nia husu ba árbitru tenke hadi’a fallansu hirak ne’e nune’e bele lori futeból ba oin. “Sé árbitru sira mak nafatin hanesan ne’e ita-nia futeból atu la’o ba oin oinsá,” nia dehan.

Ultramar hanesan ekipa úniku ne’ebé durante tinan rua tutuir malu konsege kampiaun ba Tasa 12 de Novembro.

Jornalista Hortençio Sanchez

Editór: Xisto Freitas

 

HAKEREK NO HATÁN

Please enter your comment!
Please enter your name here