Sekretáriu Estadu Formasaun Profisionál no Empregu, Julião da Silva. Imajen/Mídia SEFOPE.

DILI, 4 jullu 2019 (TATOLI)—Tuir planu, iha tinan 2020, Sekretaria Estadu Formasaun Profisionál no Empregu (SEFOPE) sei estabelese sentru formasaun ida di’ak liu no boot liu hotu kompara ho sentru formasaun sira iha Rejiaun Sudeste Aziátiku.

“Planu ne’e agora prepara hotu ona iha tinan 2020 nian. Ami sei aprezenta planu ne’e ba Konsellu Ministru no Parlamentu Nasionál. Bainhira aprova ita sei estabelese sentru formasaun ne’e para bele fó oportunidade ba joven sira hotu tuir formasaun ne’ebé di’ak nune’e sira bele kompete iha vida indústria no merkadu traballu,” dehan Sekretáriu Estadu Formasaun Profisionál no Empregu, Julião da Silva ba Agência Tatoli iha salaun enkontru Ministériu Finansa, Aitarak-Laran, Dili, ohin.

Nia esplika, sentru formasaun ne’e sei haree ba área formasaun multi kanál iha área oioin ne’ebé bele responde ba iha merkadu.

“Ita presiza orsamentu kuaze tokon $15-16 para bele estabelese sentru formasaun ida di’ak liu no boot liu iha Rejiaun Sudeste Aziátiku,” Julião esplika.

Kona-ba formadór sira atu hanorin iha sentru formasaun ne’e, governante ne’e esplika, iha rekursu natoon no kria kooperasaun ho parseiru sira ne’ebé durante apoiu nune’e bele forma joven sira ho kualifikasaun kursu ho nível boot.

Nia subliña, sentru formasaun ne’e bele akumula joven to’o rihun-sanulu ka rihun tolu-nulu no alvu hotu-hotu tenke hetan formasaun atu bele kompete iha merkadu traballu. Tuir planu, sentru formasaun ne’e sei harii iha Metinaro.

Jornalista:Nelson de Sousa

Editór: Xisto Freitas

HAKEREK NO HATÁN

Please enter your comment!
Please enter your name here