Sekretáriu Estadu Ambiente Demétrio de Amaral de Carvalho, Imajen/Egas Cristovão

DILI, 4 jullu 2019 (TATOLI)—Oitavu Governu liuhusi Sekretaria Estadu Ambiente (SEA) optimista katak to’o tinan 2030 bele hadi’a ona problema lixu (plástiku).

“Ita hatene katak plástiku sai hanesan problema boot ba ambiente. Tan ne’e, tinan-tinan esgotu sira esgotadu no tasi fo’er halo balada sira iha tasi laran barak mak sofre. Entaun, inplementa polítika ida ne’e atu hadi’a ambiente jerál,” Sekretáriu Estadu Ambiente, Demétrio do Amaral de Carvalho ba Agência Tatoli iha edifísiu Ministériu Finansa, Aitarak-Laran, Dili, ohin.

Nia esplika, saida mak sira halo ona mak sira aprezenta ona Dekretu Lei Eliminasaun Importasaun Produsaun no Distribuisaun Plástiku Uzu Úniku ba iha Konsellu Ministru no espera iha tempu badak sei hetan aprovasaun.

Tuir nia, ida ne’e primeriu hosi aspetu legál nian no kona-ba Rezolusaun Konsellu Ministru hasai atu bandu instituisaun públiku katak iha enkontru labele uza aqua botol tanba tinan-tinan hola ákua importa mai rai laran gasta milliaun $5, entaun polítika zero plástiku atu kontribui hasai osan sira ne’e.

“Parlamentu Nasionál mós reforsa ba polítika zero plástiku hodi hasai Rezolusaun Parlamentu nian,” Demétrio hatutan.

Nia informa, oras ne’e governu halo mós esforsu atu iha mekanizmu substituisaun ho estratéjia kooperasaun ho sétor privadu sira ne’ebé halo uzu plástiku alternativa sira hosi aifarina.

“Ita-nia alvu to’o tinan 2030 lixeira Tibar ka lixeira boot sira seluk ne’ebé iha tau lixu ne’e plástiku sei la liu pursentu 5,” nia sublinã.

Jornalista: Nelson de Sousa

Editór: Xisto Freitas

HAKEREK NO HATÁN

Please enter your comment!
Please enter your name here