Juventude pro-independénsia konfrontu ho POLRI (Polisi Republik Indonesia) tanba la ezekuta sira-nia mandatu ho loos tuir Akordu 5 Maiu 1999 iha Nova Iorke. POLRI haliis liu-ba parte pro-integrasaun ne’ebé provoka instabilidade atu impata Konsulta Populár ne’ebé realiza iha 30 agostu 1999. Imajen espesiál

DILI, 3 jullu 2019 (TATOLI)—Maun-alin inan feton Timor Lorosa’e. Rai-ulun to’o rai-ikun. Mai ona ba! Mai hili tuir ó-nia hakarak. Ita hotu-hotu mai hili hodi ksolok. UNAMET fó dalan ba timoroan. Iha ne’eba ita sei fó naran…

Atu fó naran ba Timor-Leste nia naran maka iha loron 5 Maiu 1999, Indonézia, Portugal no Organizasaun Nasaun Unida (ONU) atinje akordu kona-ba Timor-Timur iha Nova Iorke ne’ebé akumula akordu tolu (3) ne’ebé prinsipál; Akordu entre Governu Indonézia no Portugal kona-ba problema Timor-Timur, kria seguransa ba Determinasaun Konsulta Populár ba povu Timor-Timur no akordu kona-ba Modalidade Determinasaun Konsulta Populár liuhusi votasaun. Akordu ne’e fó biban atu kria implementasaun ba konsulta populár.

Implementasaun Konsulta Populár

Tuir Akordu 5 Maiu 1999, iha loron 11 juñu 1999, Konsellu Seguransa Organizasaun Nasaun Unida (ONU) forma Unated Nation Mission East Timor (UNAMET) atu hala’o Konsulta Populár ne’ebé atu desidi karik Timor-Timur aseita (simu) ka rejeita (la simu) opsaun konstitusionál Autonomia Espesiál ba Timor-Timur iha konseitu NKRI (Negara Kesatuan Republik Indonesia). Implementasaun misaun UNAMET tuir etapa operasionál determinasaun Konsulta Populár hanesan hakerek ona Akordu 5 Maiu númeru primeiru kona-ba; “Sekretáriu Jerál ONU atu tau proposta espesiál autonomia ba Timor-Timur (atuál Timor-Leste) iha Repúblika Indonézia, ba timoroan hotu, atu konsidera no aseita ka rejeita liuhusi Konsulta Populár ida ne’ebé direta, segredu no bulletin universál”.

  1. Etapa Habelar Informasaun
  • Organizasaun Nasaun Unida (ONU) sei prepara dokumentu kona-ba Akordu Báziku no dokumentu autonomia.
  • Organizasaun Nasaun Unida (ONU) sei habelar ka haklaken no esplika kontiúdu Akordu Báziku no dokumentu autonomia hodi la haliis no faktuál iha rai laran no iha rai Timor-Timur nia li’ur (estranjeiru).
  • Organizasaun Nasaun Unida (ONU) sei esplika ba votante sira prosesu eleisaun no prosedura sira no mós implikasaun hosi “aseita” ka “rejeita” hosi opsaun ne’ebé [Governu Indonézia] oferese.
  1. Rejistrasaun
  • Organizasaun Nasaun Unida (ONU) sei hala’o rejistrasaun iha rai laran no iha estranjeiru nafatin ba nafatin durante durasaun tempu loron 20 nia laran.
  • Organizasaun Nasaun Unida (ONU) mós hala’o atividade habelar informasaun kona-ba atividade inskrisaun.
  1. Kampaña
  • Organizasaun Nasaun Unida (ONU) sei fó sujestaun ba regra ka nórma ne’ebé sei diskute ho apoaiante sira hosi grupu ne’ebé apoiu no rejeita proposta autonomia.
  • Organizasaun Nasaun Unida (ONU) sei oferese fasilidade sira atu fó aportunidade ne’ebé hanesan ba grupu hosi parte rua [pro-independénsia no pro-integrasaun] atu habelar sira-nia pontu devista ka hanoin ba publiku.
  1. Votasaun iha Timor-Timur no mós iha Estranjeiru
  • Organizasaun Nasaun Unida (ONU) sei halo votasaun iha fatin votasaun hamutuk 200 (ne’ebé hanesan sentru rejistrasaun) iha Timor-Timur no fatin votasaun iha estranjeiru.
  1. Observadór
  • Indonézia no Portugál iha direitu haruka sira-nia reprezentante ho totál ne’ebé hanesan atu observa atividade prosesu Konsulta Populár iha rai laran ka iha rai li’ur (Timor-Timur nia li’ur).
  • Observadór Internasionál sei bele observa prosesu Konsulta Populár bazeia ba regra sira ne’ebé sei hakerek hosi Organizasaun Nasaun Unida (ONU) atu regula sira-nia prezensa.
  1. Fundu
  • Sekretáriu Jerál Nasaun Unida (ONU) sei husu konkordánsia hosi Konsellu Seguransa ba implementasaun operasaun refere atu garante fundu [orsamentu] ne’ebé presiza. Kontribuisaun voluntáriu sei distribui liuhusi Fundu Rohan Laek ne’ebé desidi ba asuntu ida ne’e.
    Jerálmente, planeamentu, preparasaun no implementasaun Konsulta Populár sei hala’o iha loron hamutuk 117 hahú hosi Akordu 5 Maiu to’o iha implementasaun ka halo Konsulta Populár ne’ebé hala’o iha loron 30 agustu 1999.

Hori hahú kedas, kontroversaun kona-bá UNAMET haliis ba parte ida [hosi parte pro-independénsia no pro-integrasaun] mosu beibeik ona. Iha prosesu preparasaun no implementasaun Konsulta Populár hosi UNAMET, akontese akontesimentu lubuk ida ne’ebé apoiante pro-integrasaun sente iha indikasaun UNAMET haliis ba grupu pro-independénsia. Persepsaun kona-ba ONU haliis ba parte ida ne’e, hamosu impaktu ne’ebé aumenta esklasaun tensaun entre parte pro-autonomia no pro-idependénsia.

Implikasaun Seguransa

Akordu 5 Maiu 1999 deside katak seguransa ba Konsulta Populár sai responsabilidade ba Indonézia. Akordu refere ezije atu iha neutralidade totál Tentara Nasional Indonesia (TNI) no Polisi Republik Indonesia (POLRI) hanesan kritéria prinsipál iha ezerse sira-nia responsabilidade ne’ebé garante situasaun seguru, livre hosi violénsia no presaun seluk, no mós atu garante lei no seguransa en-jerál. Aleinde ida ne’e, autoridade polísia sei sai hanesan instituisaun ida ne’ebé iha resposabilidade ba seguransa.

Akordu kona-ba Modalidade Determinasaun Povu Timor-Timur Nia Hanoin liuhusi Votasaun Direta no mós hateten katak Komisi Perdamaian dan Stabilitas (KPS)—Komisaun Dame no Estabilidade, ne’ebé harii iha 21 abríl 1999, sei sai hanesan parte ida ne’ebé serbisu hamutuk ho Organizasaun Nasaun Unida (ONU).

Komisi Perdamaian dan Stabilitas (KPS) nia serbisu (1) atu determina regra durante periudu antes no hafoin Konsulta Populár atu parte hotu-hotu bele halo tuir; no (2) atu foti deklarasaun ne’ebé presiza atu dezarma kilat sira hosi parte hotu-hotu. Komisi Perdamaian dan Stabilitas (KPS) mak komisaun ida ne’ebé sai fórum ba líder polítika Timor-Timur, autoridade estadu no reprezentante igreja atu hala’o papél importante iha prosesu dame antes ba Konsulta Populár.

Akordu kona-ba Modalidade Determinasaun Povu Timor-Timur Nia Hanoin liuhusi Votasaun Direta termina katak só polísia mak iha responsabilidade atu hametin lei no seguransa. Sekretáriu Jerál ONU, hafoin hetan [simu] mandatu ne’ebé presiza, sei oferese ofisiál polísia sivíl atu apoiu Polisi Republik Indonesia (POLRI) ho kapasidade nu’udar asesór. Ofisiál polísia iha Konsulta Populár mós iha ninia kna’ar atu kuidadu bulletin votu no kabina votu lori ba no mai iha fatin votasaun.

Bazeia ba akordu 5 Maiu 1999, Komando dan Kendali (Kodal) tropa seguransa, ne’ebé hahú kedas iha Brigadeiru Jenerál (Panglima ABRI) nia liman, sei entrega ka muda ba Xefe Polísia Rejionál (Kapolda) Timor-Timur. Maski iha loron 01 abríl 1999 Polisi Republik Indonesia (POLRI) haketak ona hosi ABRI (Angakatan Bersenjata Republik Indonesia)—ne’ebé hafoin ne’e muda naran sai Tentara Nasional Indonesia (TNI), POLRI sei nafatin iha Departemen Pertahanan Keamanan (Dephankam) hamutuk ho TNI. Hafoin 01 abríl 1999, POLRI sei sai parte hosi ABRI iha jenerál ABRI nia okos. Implikasaun ida hosi Akordu 5 Maiu 1999 iha POLRI nia kna’ar nu’udar responsabilidade prinsipál hametin lei no seguransa iha Timor-Timur 1999, katak buat ne’e ninia baze mak sai kna’ar boot prinsipál iha ne’ebé POLRI hala’o mesa-mesak haketak-án hosi TNI.

Atu garante neutralidade TNI/POLRI iha loron 15 juñu 1999, jenerál TNI hasai órden eskrita ida ne’ebé hateten hala’o mudansa iha kritéria ba TNI/POLRI nia susesu ne’ebé hala’o iha Timor-Timur. Objetivu mudansa ne’ebé antes buka no harahun membru Gerakan Pengacau Keamanan (KPK) iha Timor-Timur sai neutru no mós atu kuida situasaun seguransa no salvasaun. Objetivu ne’ebé haktuir iha misaun ida ne’e mak atu garante prosesu Konsulta Populár ne’ebé seguru no justu no laiha presaun hosi parte ne’ebé de’it.

Ekipa avaliasaun ONU nian ne’ebé hala’o knaar hodi vizita Timor-Timur atu prepara misaun UNAMET nian fó atensaun ba dúvida sira hosi kapasidade POLRI sira kuidadu seguransa antes Konsulta Populár tanba faktu hatudu katak, antes ne’e TNI mak hala’o nia papél seguransa ne’ebé dominante. Ekipa avaliasaun hato’o reportájen katak maski POLRI fó ona garantia pozitivu kona-ba seguransa iha Timor-Timur, nafatin iha impresaun katak POLRI sei iha kondisaun konfuzaun nia laran kona-ba grupu sira ne’ebé kaer kilat iha Timor-Timur.

Rezultadu anúnsiu Determinasaun Konsulta Populár anúnsia iha loron 4 setembru 1999, iha ne’ebé loloos sei anúnsia iha loron 7 setembru 19999. Iha loron 4 setembru 1999, Sekretáriu Jerál ONU (Kofi Annan) anúnsia katak pursentu 78.5 hosi votante ema 450.000 rejeita ona autonomia espesiál, ne’ebé halo odamatan ukun rasik-án nian nakloke luan ba Timor-Timur.

Hafoin anúnsiu rezultadu Konsulta Populár, maski iha tiha ona órden hosi Prezidente Habibie ba TNI no POLRI atu hametin lei no seguransa, maibé violénsia ho intensidade ne’ebé halo ema laran susar hahú akontese dadaun. Akontesimentu ne’e halo komunidade internasionál laran susar ne’ebé antes ne’e Sekretáriu Jerál ONU Kofi Annan hataten sai ona.

Atu prevene situasaun ne’ebé hetok manas no aat ne’e, Prezidente B.J. Habibie hasai Desizaun Nú. 107.1999 kona-ba Keadaan Darurat Militer (situasaun militár emerjénsia) iha provínsia Timor-Timur iha loron 6 setembru 1999. Governu Indonézia mós konkorda atu konvida ONU mai Timor-Timur no hatada ho entrega responsabilidade seguransa iha Timor-Timur hosi Majór Jenerál Kiki Syahnakri ba Majór Jenerál Peter Cosgrove nu’udar Komandante Tropa INTERFET ONU iha loron 27 setembru 1999.

Jornalista: Cancio Ximenes

Editór: Xisto Freitas

Klik mós notísia iha kraik atu lee…

http://www.tatoli.tl/2019/06/rai-hun-mutin-sae-dadaun-ona/

http://www.tatoli.tl/2019/06/rai-hun-mutin-sae-dadaun-ona-ii/

http://www.tatoli.tl/2019/06/rai-hun-mutin-sae-dadaun-ona-iii/

http://www.tatoli.tl/2019/06/rai-hun-mutin-sae-dadaun-ona-iv/

http://www.tatoli.tl/2019/06/rai-hun-mutin-sae-dadaun-ona-v/

http://www.tatoli.tl/2019/06/rai-hun-mutin-sae-dadaun-ona-vi/

http://www.tatoli.tl/2019/06/rai-hun-mutin-sae-dadaun-ona-vii/

http://www.tatoli.tl/2019/06/rai-hun-mutin-sae-dadaun-ona-viii/

 

HAKEREK NO HATÁN

Please enter your comment!
Please enter your name here