Koordenadora Interina ba Reforma Lejizlativa iha MRLAP, Melisa Silva Caldas. Imajen/Egas Cristovão

DILI, 3 jullu 2019 (TATOLI) – Ministériu Reforma Lejislativa no Asuntu Parlamentár (MRLAP) indika ona pontu fokál iha kada ministériu no sekretaria estadu hodi haree kona-ba matéria Reforma Lejislativa.

Porta-voz MRLAP no Koordenadora interina ba Reforma Lejislativa, Melisa Silva Caldas esplika  Pontu Fokál Reforma Lejislativa estabelese bazeia Rezolusaun Governu nú.14/2019 20 marsu, kona-ba Polítika Reforma Lejislativa.

“Ita nia Rezolusaun Governu fó dalan kada ministériu tenke identifika nia pontu fokál hodi servisu iha área Reforma Lejislativa. Sevisu ne’ebé sira halo inklui ona sira-nia servisu lorloron,” tenik Koordenadora interina Melisa Caldas ba Agência Tatoli iha nia kna’ar fatin, Gabinete MRLAP, kuarta ne’e.

Nia dehan, ba ministériu no sekretaria estadu sira, MRLAP indika ema dedikadu husi instituisaun estadu ne’e rasik atu halo liu servisu iha área Reforma Lejislativa.

“Ba pontu fokál sira, ita iha la’ós de’it asesór jurídiku mas dala ruma ita iha xefe husi gabinete jurídiku sira ou dala ruma ita iha diretór ida, naran katak sira bele ajuda iha servisu Reforma Lejislativa nian. Sira husi ministériu no sekretaria estadu rasik tanba sira mak hatene instituisaun ne’ebé sira hakna’ar ba, entaun fásil liu sira hatene instituisaun nia lala’ok no bele hato’o fali iha MRLAP,” nia akresenta.

Nia esplika, sira hanesan pontu fokál tanba sira mak sai pontu ligasaun ho ministériu ba programa reforma ne’ebé mak MRLAP atu halo, lori fali ba ministériu atu rekolla informasaun ne’ebé presiza, hafoin liuhosi sira mak ba MRLAP.

Entretantu, Polítika Reforma Lejislativa hateten, haree ba limitasaun materiál no rekursu umanu ne’ebé identifika ona, impede duplikasaun estrutura análoga sira iha departamentu governamentál ida- idak, tanba ne’e Ministériu hotu tenke identifika Pontu Fokál ida, iha estrutura ministériu nian, ne’ebé sei akompaña atividade produsaun lejislativa nian, liu-liu ba planeamentu, no halo koordenasaun regulár kona-ba atividade sira ho Ministru ne’ebé iha kompeténsia kona-ba área Reforma Lejislativa no kona-ba koordenasaun ba prosedimentu lejislativa.

Jornalista: Chatarina

Editór: Rafy Belo

HAKEREK NO HATÁN

Please enter your comment!
Please enter your name here