Primeiru-Ministru, Taur Matan Ruak (Klaran), Akompaña Husi Prezidente Parlamento Nacional Arão Noé de Jesus da Costa Amaral (Klaran ba Loos) no Prezidente Tribunál Rekursu, Deolindo dos Santos (Loos ) Hamutuk Organizasaun Internasional Loke sesaun Solene Sorumutuk Parseiru Dezenvolvimentu Timor-Leste (Timor-Leste Development Partners Meeting-TLDPM),Tinan 2019 ho Tema “Hametin Liután Koordensaun Kona-ba Finansiamentu ba Dezenvolvimentu” Iha Salaun Auditoriu Ministériu Finansas,Aitarak Laran,Dili,Kinta (04/07/2019). Imajen/Egas Cristovão

DILI, 04 jullu 2019 (TATOLI)Primeiru-Ministru (PM), Taur Matan Ruak hodi governu nia naran rekoñese vontade parseiru dezenvolvimentu nia ajuda durante ne’e, tanba ne’e, nia agradese parte hirak ne’ebé durante ne’e kontribui ba impementasaun polítika Governu liuhosi asisténsia esterna.

“Lori povu no VIII Governu Konstitusionál nia  naran, agradese país doadór sira tantu multilaterál no bilaterál ne’ebé kontinua manifesta sira-nia interese no vontade atu servisu ho ita para bele implementa Planu Estratéjia Dezenvolvimentu (PED) ita-nia no Objetivu Dezenvolvimentu Sustentável (ODS),” tenik PM perante jornalista sira iha Salaun Ministériu Finansa, kinta ne’e.

Primeiru-Ministru, Taur Matan Ruak. Imajen Tatoli/Egas Cristóvão

Ezekutivu ne’e dehan, reuniaun ho parseiru dezenvolvimentu hanesan ohin konsege paradu durante tinan rua (2017 no 2018), tanba eleisaun no situasaun polítika no tinan ne’e mak hahú fila fali atu hadi’a koordenasaun.

“Reuniaun ida ne’e nia objetivu mak oinsá ita hadi’a koordenasaun di’ak liu entre ita ho país diadór sira, atu rekursu finanseiru no apoiu sira ne’ebé sira kanaliza mai ita-nia nasaun bele uza halo di’ak hodi hetan benefísiu ba ita-nia povu no ita-nia nasaun,” dehan tan ezekutivu timoroan ne’e.

Dezde konferénsia dahuluk ho Parseiru Dezenvolvimentu sira (TLDPM-Timor-Leste’s Development Partners Meeting) to’o ohin, komunidade internasionál nafatin ho Governu maske apoia tinan ne’e konsege tun kompara ho tinan kotuk sira.

“Biar sira-nia apoia agora tuun, millaun $201 maibé karik ita kompara ho reseita fiskál sira ajudu sira ne’e sei liu ituan, entaun ida ne’e montante ne’ebé di’ak loos hodi bele hakbiit Governu loke liras oituan atu ita-nia ajuda bele to’o komunidade sira,” akresenta xefe governu.

Parseiru dezenvolvimentu sira-nia investimentu iha área oioin hanesan defeza, seguransa, edukasaun, saúde, dezenvolvimentu rurál, infraestrutura, justisa no área barak tan ne’ebé komunidade internasionál sira ne’e kontinua fó sira-nia kontribuisaun.

Jornalista: Julia Chatarina

Editór: Rafy Belo

Notísia Relevante: http://www.tatoli.tl/2019/07/tldpm-governu-hakarak-konsentra-ba-investimentu-projetu-foun/

 

HAKEREK NO HATÁN

Please enter your comment!
Please enter your name here